Presidenti i Shteteve të Bashkuara, Donald Trump, deklaroi sot se politika e tij mbi tarifat synon të nxisë prodhimin vendas të pajisjeve ushtarake dhe produkteve të teknologjisë së lartë, dhe jo të zhvillojë industrinë e tekstilit.
Duke folur para gazetarëve në Nju Xhersi, përpara se të hipte në avionin presidencial Air Force One, Trump tha se pajtohet me deklaratat e bëra më 29 prill nga Sekretari i Thesarit, Scott Bessent, i cili tha se SHBA-të “nuk kanë domosdoshmërisht nevojë për një industri tekstile të lulëzuar”, një koment që shkaktoi reagime të forta nga Këshilli Kombëtar i Organizatave të Tekstilit.
“Nuk kemi për qëllim të prodhojmë atlete dhe bluza. Synimi ynë është të prodhojmë pajisje ushtarake. Duam të prodhojmë gjëra të mëdha. Duam të prodhojmë inteligjencë artificiale,” theksoi Trump.
“Për të qenë i sinqertë, nuk kam synim të prodhoj bluza apo çorape. Këto mund të prodhohen shumë mirë edhe në vende të tjera. Ne duam të prodhojmë mikroprocesorë, kompjuterë dhe shumë produkte të tjera, si tanke dhe anije,” shtoi ai.
Megjithatë, Shoqata Amerikane e Industrisë së Veshjeve dhe Këpucëve (AAFA) reagoi ndaj komenteve të Trump, duke theksuar se tarifat janë të dëmshme për sektorin.
“Me 97% të veshjeve dhe këpucëve që vishen në SHBA të importuara, dhe me këtë sektor që përballet tashmë me nivelin më të lartë të tarifave doganore në vend, është koha të përqendrohemi në zgjidhje praktike që mund të sjellin përmirësime,” deklaroi Steve Lamar, president i AAFA.
“Rritja e tarifave do të thotë kosto më të larta për prodhuesit amerikanë dhe çmime më të larta për konsumatorët, gjë që godet më shumë ata me të ardhura të ulëta,” shtoi ai.
