Ukraina nuk e vë në diskutim, rajoni i Donbasit nuk do t’i kalojë Rusisë! Presidenti ukrainas, Volodymyr Zelensky, refuzon t’i japë kontrollin e këtij rajoni presidentit Vladimir Putin në këmbim të një shkëmbimi.
Në takimin e një dite më parë me presidentin amerikan, Donald Trump, në Alaskë, thuhet se Putin ka ofruar ndalim të luftimeve dhe ngrirje të vijës së frontit në këmbim të kontrollit mbi rajonin lindor të Ukrainës, Donbasin.
Propozimi do të ishte gjithashtu në kundërshtim me paralajmërimet e liderëve të BE-së se në çdo marrëveshje paqeje, “integriteti territorial” i Ukrainës duhet të respektohet dhe “kufijtë ndërkombëtarë nuk duhet të ndryshohen me forcë”.
Presidenti i SHBA-së, Donald Trump, tha se ai dhe Presidenti rus, Vladimir Putin, bënë “përparime të mëdha” por nuk dolën nga samiti në Alaska me një marrëveshje mbi luftën në Ukrainë. “Nuk ka marrëveshje deri sa të ketë marrëveshje,” tha Trump, duke shtuar se më pas do të bëjë thirrje për NATO-n dhe Kievin.
Trump dhe Putin folën pranë njëri-tjetrit në skenë për rreth 10 minuta. Të dy treguan se kishte përparime gjatë bisedimeve private, por ato përfunduan pa një marrëveshje të qëndrueshme. Putin thotë se është “sinqerisht i interesuar” të vendosë një fund të konfliktit, të cilin e përshkroi si një “tragjedi”.
Por ai thotë se Rusia duhet të eliminojë “shkaqet kryesore” të konfliktit – dhe paralajmëron se Ukraina dhe Europa nuk duhet të “sabotojnë” bisedimet.
