Kryeministri Edi Rama ka dhënë një mesazh të drejtpërdrejtë për Prishtinën, teksa foli sot nga Londra për dialogun Kosovë–Serbi, në panelin e Chatham House.
Sipas tij, për të pasur sukses dhe për të ecur përpara drejt integrimit evropian, Kosova duhet të fokusohet në përmbushjen e të gjitha detyrimeve që rrjedhin nga dialogu me Serbinë, pa u kushtëzuar nga veprimet e Beogradit.
“Që të jetë e suksesshme, Kosova duhet të harrojë Serbinë dhe të realizojë të gjitha pikat e dialogut. T’ia lërë topin në fushën e Serbisë. Të lërë Europën të merret me Serbinë dhe jo ta lërë çështjen të shndërrohet në fajësim të saj,” – tha Rama gjatë diskutimit në Londër.
Kreu i qeverisë theksoi se është në interesin e Kosovës që të ruajë qetësinë, të dëshmojë vullnetin për zbatimin e marrëveshjeve dhe të mos i japë BE-së apo ndërkombëtarëve asnjë arsye për ta parë si palë problematike.
Kryeministri nënvizoi se i takon Kosovës të shtyjë përpara dhe të bindë vendet hezituese përmes një qëndrimi të matur dhe të qëndrueshëm politik, që përputhet me vlerat e Bashkimit Evropian.
Edi Rama: Kosova është republikë një shtet i ri demokratik i njohur nga fuqitë e mëdha dhe ende jo i njohur nga pesë vende nga BE. Në këtë drejtim nuk shoh problem. Nga ana tjetër i takon Kosovës që të shtyjë përpara dhe të bindë pjesën tjetër për pozicionin e konsoliduar sa i takon vlerave në botën demokratike dhe BE. Që të jetë e suksesshme Kosova duhet të harrojë Serbinë dhe të realizojë të gjitha pikat e dialogut. T’ia lënë topin në fushë Serbinë, të lënë Europën të merret me Serbinë. Dhe jo ta lënë cështjen të shndërrohet në fajësim të tyre.
