Reperi A$AP Rocky, partneri i Rihanna-s, është shpallur i pafajshëm për të gjitha akuzat nga juria të martën në gjyqin e tij penal për krime të rënda në Los Angeles. Artisti 36-vjeçar ishte akuzuar për dy krime të rënda të sulmit me armë gjysmë-automatike në lidhje me një incident të ndodhur në nëntor të vitit 2021 në Hollywood, ku viktimë e supozuar ishte ish-miku i tij, A$AP Relli.
Gjyqi ka ardhur pas një periudhe tensioni, pasi nëse shpallej fajtor, Rocky mund të përballej me deri në 24 vite burg. Ai ka shprehur falenderime ndaj jurisë dhe avokatëve të tij pas shpalljes së pafajësisë.
Gjatë gjyqit, prokurorët pretenduan se Rocky kishte qëlluar dy herë ndaj Relli-t, por mbrojtja argumentoi se ai përdori një armë rekuizitë, që nuk lëshonte plumba të vërtetë, por fishekë bosh, për të frikësuar Relli-n, i cili sipas tyre po sulmonte një anëtar tjetër të grupit.
Pas vendimit, Rihanna, partnerja e tij, shpërtheu në lot dhe e përqafoi atë, ndërsa të dy së bashku festuan brenda dhe jashtë sallës së gjyqit. Rihanna dhe dy fëmijët e çiftit ishin të pranishëm gjatë seancave të gjyqit për të mbështetur A$AP Rocky-n.
Vendimi i pafajësisë ka ardhur në një periudhë kyçe për karrierën e Rocky-t, i cili pritet të shfaqet në disa projekte të mëdha muzikore dhe filmike këtë vit.
