Vala e të nxehtit duket se ka ndikuar ndjeshëm në cilësinë e gjumit të njerëzve, sipas një studimi të ri i cili zbulon se në zonat ku temperatura i kalon 25 gradë Celsius, gjasat për të fjetur më pak se shtatë orë rriten me 3.5%. Në veçanti, sipas një studimi të kryer nga Universiteti i Kolumbisë, gjatë orëve të mbrëmjes merkuri rritet më shpejt se gjatë ditës në shumicën e zonave të banuara, një fakt që trupi i njeriut e percepton.
Duke përdorur modele klimatike globale për të parashikuar humbjen e mundshme të gjumit, studiuesit zbuluan se nëse emetimet e gazeve serrë vazhdojnë me të njëjtin ritëm, deri në vitin 2099 çdo person mund të humbasë mesatarisht 50 deri në 58 orë gjumë në javë. Kilton Minor, një studiues në Universitetin e Kolumbisë, shpjegoi për Euronews: “Ne zbuluam se në kushte normale të jetesës, njerëzit duket se përshtaten shumë më mirë me temperaturat më të ftohta të jashtme, sesa me kushtet më të ngrohta”.
Duhet të theksohet se, sipas studiuesve, cilësia e dobët e gjumit mund të rrisë lëndimet në punë, të shkaktojë probleme përqendrimi dhe të rrisë rrezikun e sëmundjeve kardiovaskulare. Njerëzit e moshuar gjithashtu mund të jenë më të prekshëm ndaj valëve të të nxehtit, pasi një studim tregon se edhe ekspozimi i lehtë ndaj nxehtësisë mund të zvogëlojë gjumin e thellë tek burrat e moshuar.
Nëse jeni vazhdimisht të rraskapitur, ndoshta ia vlen të kontrolloni nëse kjo vjen si pasojë e një gjendjeje mjekësore. Sidoqoftë, sipas mjekut të përgjithshëm britanik Dr. Asif Ahmed, përgjigjja nuk është gjithmonë e thjeshtë. Ai sugjeron që kushdo që përjeton disa simptoma të zakonshme, duhet të diskutojë me mjekun mundësinë e një çrregullimi neurologjik funksional (FND). Ky çrregullim lidhet me mënyrën se si truri përpunon sinjalet që merr dhe i dërgon ato në trup, pa dëmtuar në mënyrë strukturore nervat apo trurin.
