Të paktën 12 persona kanë humbur jetën dhe shtatë të tjerë janë plagosur si pasojë e një sulmi me dron rus pranë një autobusi në Ukrainën lindore, kanë bërë të ditur autoritetet lokale.
Sulmi ndodhi në rrethin e Pavlohradit, sipas shefit të administratës ushtarake rajonale, Oleksandr Ganzha.
Në një njoftim në Telegram, Ganzha tha se autoritetet janë duke hetuar rrethanat e ngjarjes, ndërsa në rajon ishte shpallur alarm ajror në momentin e sulmit. Kompania energjetike DTEK konfirmoi se autobusi po transportonte punëtorët e saj nga një minierë.
Ndërkohë, sulme të tjera me dron janë raportuar edhe në zona të ndryshme të vendit. Të paktën nëntë persona u plagosën herët të dielën, përfshirë gjashtë në një maternitet në Zaporizhzhia, ku dy gra po i nënshtroheshin ekzaminimeve mjekësore në momentin e goditjes.
Autoritetet njoftuan gjithashtu se tre persona janë vrarë në sulme të ndara në rajonin jugor të Khersonit dhe në qytetin qendror të Dnipros.
LEXO EDHE: Kreu i Parlamentit në Rusi: Deputetët kanë kërkuar që Moska të përdorë armë më të forta në Ukrainë!
Të enjten, presidenti amerikan Donald Trump njoftoi se Vladimir Putin kishte rënë dakord të ndalonte përkohësisht sulmet ndaj qyteteve kryesore të Ukrainës gjatë valës së të ftohtit ekstrem.
Sistemi energjetik i Ukrainës është vënë në shënjestër për të katërtin dimër radhazi, duke u bërë gjithnjë e më i brishtë. Inxhinierët po punojnë pa ndërprerje për të rikthyer energjinë dhe ngrohjen, por besimi i qytetarëve se Rusia do të respektonte armëpushimin ishte i ulët.
Ndërsa bisedimet për paqe vazhdojnë me ndërmjetësimin e SHBA-ve, shumë ukrainas shprehen skeptikë.
