Donald Trump paralajmëroi amerikanët se mund të përballen me “vuajtje” ekonomike, për shkak të tarifave tregtare që sapo ka vendosur ndaj partnerëve tregtarë të SHBA-ve. Gjithashtu, kërcënoi me luftë më të gjerë tregtare, për të përfshirë edhe Bashkimin Europian (BE) e mbase Britaninë e Madhe.
A do të ketë vuajtje? Po, mbase (dhe mbase jo!). Megjithatë do t’ia vlejë barra qiranë.
Trump iu tha gazetarëve se synon të bisedojë me liderët e Kanadasë dhe Meksikës në lidhje me tarifat, për të cilat ekspertët thonë se mund të trazojnë ekonominë botërore. Por, Trump nuk tregoi nëse po i rishqyrtonte veprimet e tij.
Nuk pres asgjë shumë dramatike. Tarifat ndaj mallrave nga BE-ja do të vendosen patjetër dhe kjo do të ndodhë shumë shpejt.
Presidenti la të kuptohej se edhe Britania e Madhe mund të përballet me tarifa. BE-ja u shpreh se do të kundërpërgjigjet “fuqishëm”, nëse Trump vendos tarifa, pavarësisht se shpreson në shmangien e një lufte tregtare përmes bisedimeve.
Bashkimi Europian shpreh keqardhje mbi vendimin e SHBA-ve për të vendosur tarifa ndaj Kanadasë, Meksikës dhe Kinës.
Vendet e prekura, Kanadaja, Meksika dhe Kina kërcënuan se do të ndërmarrin veprime hakmarrëse, si edhe bënë thirrje për bisedime tregtare në vend të tarifave, që mund t’i rrisin çmimet për konsumatorët e t’i dëmtojnë ekonomitë e të gjitha palëve të përfshira.
Trump tha se i vuri këto tarifa ndaj fqinjëve të SHBA-ve që të ndalet fluksi i emigrantëve dhe i fentanilit të paligjshëm në Shtetet e Bashkuara edhe pse shkaktari i këtyre çështjeve është shumë i diskutueshëm e përfshin një sërë faktorësh të ndërlikuar.
Këto tarifa do të ndihmojnë në uljen e deficitit tregtar me partnerët kryesorë dhe do të nxisin prodhimin industrial në SHBA. Uashingtoni do t’i godasë Kanadanë dhe Meksikën me tarifa prej 25% për të gjitha mallrat, megjithëse produktet energjetike kanadeze do të përballen me 10%. Tarifat e reja përfshijnë një taksë prej 10% për mallrat nga Kina, përveç atyre të vendosura më parë. Tarifat për mallrat nga të tre vendet do të hyjnë në fuqi më 4 shkurt.
Trump nuk i kushtoi rëndësi kërcënimit të Kanadasë për veprime hakmarrëse, duke thënë:
Nëse duan ta luajnë lojën, nuk e kam telash. Mund ta luajmë lojën sa të duan ata. Pa tregtinë me SHBA-të, Kanadaja nuk do të jetë vend i qëndrueshëm. E vrazhdë, por e vërtetë! Prandaj, Kanadaja duhet të bëhet shteti ynë i dashur i 51-të. Taksa shumë më të ulëta dhe mbrojtje shumë më e mirë ushtarake për popullin e Kanadasë – DHE ASNJË TARIFE!
Kryeministri kanadez, Justin Trudeau ka njoftuar synimin për t’u larguar nga posti i kryeministrit dhe partia e tij Liberale do ta zgjedhë liderin e ri, më 9 mars. Zgjedhjet pritet të mbahen në pranverë. Kanadaja synon të vendosë tarifa prej 25% ndaj importeve nga SHBA-të, përfshirë pijet, produktet kozmetike dhe letrën.
Presidentja meksikane, Claudia Sheinbaum, deklaroi se do të japë hollësi mbi përgjigjen e vendit të saj më 3 shkurt. Edhe Kina ka thënë se do t’i kundërpërgjigjet Trumpit.
