Një qasje e re terapeutike po sjell shpresë të madhe për pacientët me kancer të prostatës në fazat e hershme të përhapjes. Radioterapia e drejtuar ndaj metastazave është dëshmuar shumë efektive në ndalimin e përparimit të sëmundjes, pa shkaktuar efekte të rënda anësore apo toksicitet të rrezikshëm. Këto rezultate vijnë nga një studim i ri i realizuar nga shkencëtarët e University of Texas MD Anderson Cancer Center dhe i publikuar në revistën prestigjioze The Lancet Oncology.
Terapia e drejtuar ndaj metastazave (MDT – Metastasis-Directed Therapy) ka përmirësuar ndjeshëm rezultatet tek pacientët me kancer oligometastatik të prostatës, një formë e sëmundjes ku ekzistojnë disa metastaza, por jo në përhapje të gjerë. Studimi përfaqëson meta-analizën e parë të të dhënave individuale të pacientëve nga të gjitha provat klinike të randomizuara të disponueshme që kanë vlerësuar shtimin e radioterapisë së drejtuar ndaj metastazave në trajtimin standard.
Sipas autorit kryesor, Dr. Chad Tang, profesor i onkologjisë radioterapike genitourinare në MD Anderson Cancer Center, sigurimi i provave të nivelit të parë për përfitimet e kësaj terapie ka qenë sfidues, sepse vetëm një përqindje e vogël pacientësh diagnostikohen me formën oligometastatike të kancerit. “Nëse arrijmë ta identifikojmë dhe trajtojmë sëmundjen në një dritare të ngushtë kohore, para se ajo të përhapet gjerësisht, dimë se rezultatet për pacientët janë ndjeshëm më të mira”, shpjegon Dr. Tang.
Radioterapia e drejtuar ndaj metastazave zakonisht realizohet përmes radioterapisë stereotaktike të trupit, një formë shumë precize rrezatimi që synon drejtpërdrejt lezionet metastatike, duke kursyer indet përreth. Kjo qasje vonon kohën deri në progresionin e sëmundjes, shtyn nevojën për terapi më agresive hormonale, ndihmon në ruajtjen e cilësisë së jetës. Për të kapërcyer mungesën e të dhënave të nivelit të parë, studiues nga disa institucione formuan një konsorcium global të quajtur X-MET, me qëllim grumbullimin e të dhënave nga të gjitha provat klinike të randomizuara.
Meta-analiza, e njohur si WOLVERINE, përfshiu të dhëna individuale nga 7 studime dhe gjithsej 574 burra me kancer oligometastatik të prostatës. Rezultatet treguan përfitime të qarta për pacientët që morën terapinë e drejtuar ndaj metastazave 7,6 muaj më shumë pa progresion të sëmundjes 4,9 muaj më shumë pa progresion radiografik 2,5 muaj më shumë pa zhvillim të rezistencës ndaj kastrimit Këto rezultate ishin konsistente në të gjitha studimet e përfshira. Një nga aspektet më inkurajuese të studimit është profili i sigurisë. Nuk u raportua asnjë toksicitet i shkallës së pestë (forma më e rëndë), ndërsa efektet anësore mbi shkallën e dytë ishin të ngjashme mes grupit që mori MDT dhe atij që mori vetëm trajtimin standard.
