Pas suksesit të “dopamine dressing” në botën e modës, tani trendi i ngjyrave që nxisin humor pozitiv ka pushtuar edhe dizajnin e interierit. “Dopamine decor” është tendenca më e re që po qarkullon në rrjetet sociale dhe në botën e arkitekturës së brendshme, duke sjellë në shtëpi ngjyra të forta, kontraste të guximshme dhe elemente që zgjojnë energji pozitive.
Psikologët thonë se:
Ngjyrat kanë ndikim të drejtpërdrejtë në emocionet tona: e verdha lidhet me optimizmin, bluja me qetësinë, ndërsa e kuqja stimulon energjinë dhe pasionin.
Dizajnerët modernë po sugjerojnë që ky trend nuk ka të bëjë me rregulla të ngurta, por me krijimin e hapësirave që reflektojnë personalitetin dhe dëshirat individuale. Shumë njerëz kanë filluar të eksperimentojnë me mure të lyer me nuanca të guximshme, mobilie me ton pastel por të fortë, si dhe dekorime artistike që i japin shtëpisë një karakter unik.
Ky stil, përveçse estetik, ka edhe një funksion emocional: kthehet në një terapi të përditshme për të luftuar monotoninë dhe stresin. Nuk është çudi që #dopaminedecor është bërë një hashtag viral me miliona klikime në TikTok dhe Instagram, duke treguar se bukuria e shtëpisë nuk është më vetëm harmoni klasike, por edhe shpërthim ngjyrash që të bëjnë të ndihesh gjallë.
