Presidenti amerikan, Donald Trump, konfirmoi se ka autorizuar Agjencinë Qendrore të Inteligjencës (CIA) për të kryer operacione të fshehta në Venezuelë. Ky njoftim shënon një përshkallëzim në përpjekjet e Uashingtonit për t’i bërë presion qeverisë së presidentit venezuelian, Nicolas Maduro.
Fillimisht, The New York Times raportoi për direktivën e klasifikuar, duke cituar zyrtarë amerikanë që kishin informacione për këtë vendim.
Strategjia e administratës Trump për Venezuelën synon rrëzimin e Maduros nga pushteti. Administrata ka ofruar 50 milion dollarë shpërblim për informacione që çojnë në arrestimin dhe dënimin e tij për akuza të trafikut të drogës.
CIA-s i lejohet të kryejë operacione vdekjeprurëse në Venezuelë e të zhvillojë një sërë operacionesh në Karaibe.
I pyetur pse e autorizoi CIA-n të veprojë në Venezuelë, Trump u tha gazetarëve se arsyet lidhen me emigrimin e venezuelianëve drejt SHBA-ve, si dhe trafiku i drogës.
E autorizova për dy arsye. Së pari, ata i kanë zbrazur burgjet e tyre në SHBA… erdhën përmes kufirit. Ata erdhën sepse ne kishim një kufi të hapur. Arsyeja tjetër janë drogat.
Trump nuk ofroi prova lidhur me pretendimin e tij se Venezuela po dërgon në SHBA ish të burgosur. Presidenti amerikan shtoi se Amerika ka bërë përparim në ndalimin e dërgesave të drogës përmes detit dhe se përpjekje të tjera po shënohen për të ndërprerë linjat tokësore të kontrabandës.
Shtëpia e Bardhë nuk ka pranuar të japë detaje se për çfarë veprimesh specifike presidenti ka autorizuar CIA-n, që ka një historitë të gjatë të operacioneve në Amerikën Latine, sidomos gjatë Luftës së Ftohtë dhe ka ndihmuar në rrëzimin e perandorive të trafikut të kokainës në Amerikën e Jugut, në fund të shekullit XX.
Qeveria e Venezuelës tha se deklaratat e Trump-it përbëjnë shkelje të ligjit ndërkombëtar dhe shtoi se veprimet e Uashingtonit kanë për qëllim të legjitimojnë një operacion të “ndryshimit të regjimit” me synim të marrjes nën kontroll të burimeve të naftës që ka vendi.
Misioni ynë i përhershëm në OKB do ta paraqesë këtë ankesë në Këshillin e Sigurimit dhe te sekretari i Përgjithshëm, duke kërkuar llogaridhënie nga qeveria amerikane, u theksua në një deklaratë të publikuar nga ministri i Jashtëm i Venezuelës, Yvan Gil, në llogarinë e tij në Telegram.
Trump vazhdimisht ka akuzuar Venezuelën se është në fokus për trafikun e drogës vdekjeprurëse fentanil, por të dhënat zyrtare të SHBA-ve kanë treguar se Meksika është burimi kryesor i fentanilit.
Një gazetar e pyeti Trump-in pse nuk kishte urdhëruar Rojet Bregdetare të ndalonin anijet e dyshuara për trafik droge, praktikë e përdorur nga SHBA-të për dekada. Trump e quajti një veprim të tillë “politikisht korrekt”, por shtoi se nuk ka funksionuar.
