Me temperaturat e larta, këshillat për të pirë më shumë ujë janë kudo. Në rrjetet sociale qarkullojnë vazhdimisht video për hidratimin, ndërsa pijet sportive premtojnë performancë më të mirë dhe hidratim më efikas. Por sa ujë na duhet vërtet? Dhe a janë të nevojshme elektrolitet apo pijet sportive? Sipas ekspertëve, hidratimi nuk është aq i thjeshtë sa rregulli i njohur i “tetë gotave ujë në ditë”. Nevojat për ujë ndryshojnë nga një person te tjetri dhe varen nga temperatura, aktiviteti fizik, mosha dhe organizmi i secilit.
1. Nuk ekziston një sasi e njëjtë uji për të gjithë
Sipas Autoritetit Evropian për Sigurinë Ushqimore, gratë adulte kanë nevojë mesatarisht për rreth 2 litra lëngje në ditë, ndërsa burrat për 2.5 litra. Në ditët shumë të nxehta ose gjatë aktivitetit fizik intensiv, kjo sasi duhet të rritet. Ekspertët theksojnë se në këtë sasi përfshihen jo vetëm uji, por edhe çaji, kafeja, qumështi dhe pijet e tjera.
2. Edhe ushqimi ju hidraton
Rreth 20 për qind e ujit që i nevojitet organizmit merret nga ushqimi. Frutat dhe perimet si kastraveci, shalqiri, domatet apo portokalli përmbajnë shumë ujë dhe kontribuojnë ndjeshëm në hidratimin e organizmit.
3. Elektrolitet nuk janë të nevojshme për shumicën e njerëzve
Pijet me elektrolite janë të dobishme kryesisht për sportistët që ushtrohen për periudha të gjata dhe humbasin shumë djersë. Për shumicën e njerëzve, një regjim ushqimor normal siguron mjaftueshëm natrium dhe minerale të tjera, ndaj problemi më i zakonshëm mbetet mungesa e ujit, jo e elektroliteve.
4. Qumështi mund të hidratojë më mirë se uji
Një studim tregoi se qumështi qëndron më gjatë në organizëm sesa uji, falë përmbajtjes së proteinave dhe elektroliteve që ngadalësojnë zbrazjen e stomakut. Megjithatë, kjo nuk do të thotë se duhet të zëvendësoni ujin me qumësht, por se edhe ai mund të jetë një burim i mirë hidratimi.
5. Etja nuk është gjithmonë treguesi më i mirë
Shkencëtarët shpjegojnë se organizmi shpesh nuk jep sinjalin e etjes derisa të ketë humbur rreth 2 për qind të peshës trupore nga mungesa e lëngjeve. Në atë moment mund të shfaqen lodhje, ulje e energjisë, ndryshime të humorit dhe vështirësi në përqendrim.
6. Hidratimi ndikon edhe në shëndetin afatgjatë
Një studim i Institutit Kombëtar të Shëndetit në SHBA zbuloi se njerëzit që nuk hidratojnë mjaftueshëm organizmin kanë rrezik më të lartë për sëmundje kronike, plakje më të shpejtë dhe madje vdekje të parakohshme. Ekspertët rekomandojnë të konsumohen rregullisht lëngje gjatë ditës dhe të mos pritet gjithmonë derisa të shfaqet etja, veçanërisht gjatë vapës ose aktivitetit fizik.
