Presidentët e Shteteve të Bashkuara të Amerikës dhe Iranit nënshkruan një memorandum mirëkuptimi, si marrëveshje fillestare për paqe, me synimin për t’i dhënë fund konfliktit në Lindjen e Mesme, prej 28 shkurtit.
Donald Trump e firmosi dje memorandumin e mirëkuptimit, gjatë një darke nën dritën e qirinjve në Pallatin e Versajës, pas samitit të G7-ës.
Memorandumi hyn në fuqi menjëherë.
Një video e shpërndarë nga Shtëpia e Bardhë dhe nga presidenti francez Emmanuel Macron në platformën X, shfaq Trump-in duke e nënshkruar dokumentin.
Kjo nuk ishte e lehtë, u shpreh Trump teksa nënshkruante, ndërsa Macron e të tjerë të ftuar e duartrokisnin.
Kjo marrëveshje hap rrugën për një paqe të qëndrueshme, si dhe lejon rihapjen e Ngushticës së Hormuzit, shkroi Macron në X.
Agjencia shtetërore iraniane e lajmeve, IRNA, publikoi foto që tregojnë presidentin iranian, Masud Pezeshkian, duke e nënshkruar marrëveshjen midis Iranit dhe Shteteve të Bashkuara të Amerikës.
Në fotografi, presidenti iranian shfaq faqet e marrëveshjes para kamerave, ku shihen qartë si firma e tij ashtu edhe ajo e presidentit amerikan, Donald Trump.
Kryeministri i Pakistanit, Shehbaz Sharif, qeveria e të cilit ndihmoi në ndërmjetësimin e marrëveshjes, njoftoi në platformën X se akordi hyn në fuqi menjëherë.
Si masë fillestare për ndërtimin e besimit, Republika Islamike e Iranit do të rihapë Ngushticën e Hormuzit, ndërsa Uashingtoni do të heqë bllokadën detare.
Sipas marrëveshjes, Irani gjithashtu duhet të lehtësojë kalimin e sigurt të anijeve tregtare në këtë rrugë jetike ujore pa pagesë për 60 ditë. Kjo gjatë bisedimeve për një kornizë afatgjate detare me Omanin dhe shtetet arabe të Gjirit.
Shtetet e Bashkuara të Amerikës do të fillojnë menjëherë që ta heqin bllokadën e tyre detare dhe do ta realizojnë këtë plotësisht brenda 30 ditëve, sipas burimeve të informuara.
