Pak para kurorëzimit të Miss Universe të këtij viti, u njoftua se Miss Xhamajka, Gabrielle Henry, kishte rënë nga skena dhe u plagos aq rëndë saqë u dërgua me urgjencë në spital. Së fundmi bëhet me dije se gjendja e saj shëndetësore nuk është e mirë. Në një njoftim për shtyp të lëshuar nga kompania organizuese e konkursit të bukurisë, u zbulua se Henry pësoi, ndër lëndime të tjera, një hemorragji intrakraniale. Menjëherë pas rënies së saj, konkurrentja u transferua në një spital të Bangkokut, në një njësi kujdesi intensiv në gjendje kritike. Deri më sot, ajo monitorohet nga afër nga mjekët, 24 orë në ditë.
Rikujtojmë, se Miss Universe Norvegjia, Leonora Lysglimt-Rødland, e cila u bë një sensacion viral falë kostumit të saj ngjyrë salmoni, trazoi publikun me pretendimet se rezultati i konkursit Miss Universe 2025 ishte i paracaktuar. Përfaqësuesja norvegjeze pretendon se lista e 10 finalisteve më të mira ishte bërë e ditur ditë para vetë finales. Në një transmetim të drejtpërdrejtë të kohëve të fundit në mediat sociale, Lysglimt-Rødland shprehu zhgënjimin e saj.
“Miss Universe kishte zgjedhur 10 më të mirat para finales, rreth 15 ditë më parë. Kështu që të gjithë u zhgënjyem shumë kur e dëgjuam këtë. Menduam, çfarë kuptimi ka konkursi nëse organizata e Miss Universe e ka marrë tashmë vendimin e saj. Kjo ishte e vërtetë”. Pavarësisht popullaritetit të jashtëzakonshëm që fitoi pasi u shfaq në skenë e veshur si një salmon gjigant norvegjez, Lysglimt-Rødland nuk arriti të futej në 12 më të mirat, të cilat ajo i përmendi në fjalimin e saj si provë se vendimet ishin marrë paraprakisht. Akuzat e saj vijnë menjëherë pasi meksikanja Fátima Bosch u kurorëzua Miss Universe 2025 në Nonthaburi të Tajlandës.
