Presidenti amerikan Donald Trump ka bërë të qartë se grupi palestinez Hamas ka në dispozicion vetëm tre deri në katër ditë për të dhënë përgjigje mbi planin e propozuar nga Uashingtoni për përfundimin e luftës në Rripin e Gazës.
Sipas Trump, hapësira për negociata është shumë e kufizuar, pasi kërkesat kryesore mbeten të pandryshueshme: lirimi i të gjithë pengjeve dhe respektimi i një “sjelljeje të mirë” nga ana e Hamasit.
“Po presim përgjigjen e Hamasit”, deklaroi Trump, duke nënvizuar se propozimi nuk lejon shumë ndryshime apo modifikime.
Ai paralajmëroi gjithashtu se, nëse Hamas e refuzon planin, atëherë SHBA do t’i japë Izraelit “dorë të lirë për të vepruar siç e sheh të arsyeshme”.
Hamas tregon qëndrim pozitiv ndaj planit amerikan
Ndërkohë, sipas burimeve të “CBS News”, Hamas dhe grupe të tjera palestineze po e shqyrtojnë me qëndrim pozitiv planin e Trump dhe pritet t’ua paraqesin përgjigjen e tyre ndërmjetësuesve egjiptianë dhe katarias më të mërkurën.
Plani i paraqitur nga Trump në Shtëpinë e Bardhë, në prani të kryeministrit izraelit Benjamin Netanyahu, përbëhet nga 20 pika dhe përfshin:
Një armëpushim të menjëhershëm në Gaza,
Lirimin e të gjithë pengjeve të mbetura,
Shkëmbimin me një numër të të burgosurve palestinezë që ndodhen në burgjet izraelite,
Shtimin e ndihmës humanitare,
Kalimin e kontrollit të Gazës tek një administratë kalimtare palestineze me përbërje teknokrate.
Kjo administratë do të mbikëqyret nga një “Këshill Ndërkombëtar i Paqes”, me në krye vetë presidentin Trump dhe me pjesëmarrjen e ish-kryeministrit britanik Tony Blair.
Burime diplomatike bëjnë të ditur se ndërmjetësuesit egjiptianë dhe katarias u kanë dorëzuar tashmë një kopje të planit përfaqësuesve të Hamasit. Plani parashikon gjithashtu që Izraeli të ruajë kontrollin e sigurisë në kufijtë e Gazës.
