Ambasada amerikane në Tiranë ngre alarmin për një kërcënim të mundshëm që shënjestron një samit të organizuar nga opozita e Iranit në emigracion e që mbahet nesër e të dielën në Durrës. Në njoftimin e selisë diplomatike të Uashingtonit thuhet:
Qeveria e Shteteve të Bashkuara të Amerikës është në dijeni të një kërcënimi të mundshëm, i cili ka në shënjestër takimin botëror të nivelit të lartë të Iranit të lirë, që do të mbahet pranë Durrësit nga data 23 deri më 24 korrik.
Security Alert – Threat Targeting the Free Iran World Summit 👉 https://t.co/VPmqYCiNAl pic.twitter.com/iuxHLtNPfo
— USEmbassyTirana (@USEmbassyTirana) July 21, 2022
Qytetarët amerikanë udhëzohen nga ambasada që të shmangin këtë aktivitet.
Samiti i kësaj fundjave në Durrës, organizohet nga Këshilli Kombëtar i Rezistencës së Iranit (NCRI) dhe Organizata e Muxhahedinëve të Popullit të Iranit (MEK), dy grupe që mbështesin përmbysjen e qeverisë në Republikën Islamike. Siç dihet, prej vitit 2016, në vendin tonë strehohen rreth 3 mijë anëtarë të MEK-ut.
Në këtë samit do të marrin pjesë qindra politikanë dhe deputetë të njohur, nga të dyja anët e Atlantikut e më gjerë. Po ashtu, qindra mijëra iranianë pritet të bashkohen online nga shumë vende të botës. Një ditë më parë, kryeministri Edi Rama tha se Shqipëria ishte shënjestër e një sulmi kibernetik nga një shtet jomiqësor, që sulmoi të gjitha portalet qeveritare dhe atë të shërbimeve e-Albania.
Autoritetet ende nuk bëjnë të ditur nëse bëhet fjalë për të njëjtin kërcënim. Kujtojmë se në janar të vitit 2020, zyrtarët shqiptarë urdhëruan dëbimin e dy diplomatëve iranianë, të cilët u shpallën “non grata”. Njëri prej tyre dyshohej si anëtar i Gardës Revolucionare të Iranit, ndërsa personi tjetër, si pjesë e Njësisë Operacionale të Shërbimeve Sekrete iraniane.
Një muaj më parë, kampi Ashraf pranë Durrësit u vizitua nga ish-zv.presidenti i Shteteve të Bashkuara të Amerikës, Mike Pence, ndërsa në maj të po këtij viti, të njëjtin kamp e vizitoi edhe ish-sekretari amerikan i Shtetit, Mike Pompeo.