Presidenti i UEFA-s, Aleksandër Ceferin, është shprehur plotësisht i bindur se Spanja dhe Portugalia do të jenë organizatorët e Botërorit 2030.
Numri një i UEFA-s ka marrë pjesë në inaugurimin e kongresit ndërkombëtar “Football Talks”, që po mbahet në Lisbonë (Portugali), ku ka mbështetur plotësisht kandidaturën e dy vendeve të gadishullit Iberik për të pritur Botërorin që do të luhet pas 8 vitesh.
“Jam i sigurt se Botërori 2030 do të luhet në Spanjë e Portugali, dy vende që jetojnë me futbollin. Kjo është një kandidaturë fituese dhe do të bëjmë gjithçka për të ndihmuar këto dy vende të fitojnë të drejtën për organizimin e Botërorit.
Ne si UEFA do të bëjmë gjithçka për të ndërtuar një infrastrukturë moderne të denjë për mikpritjen e një evenimenti të kësaj shkalle”.
Përveç mbështetjes europiane, edhe federatat arabe e kanë miratuar “ofertën” iberike, falë organizimit të Superkupës së Spanjës në Arabinë Saudite.
Si krerët e shteteve ashtu edhe qeveritë e Spanjës dhe Portugalisë kanë treguar mbështetje absolute për projektin dhe e shohin atë si një mundësi të madhe për të dy vendet, si në aspektin ekonomik, ashtu edhe në atë sportiv dhe social.