Reperi i njohur Kanye West është duke i kushtuar vëmendje maksimale albumit të tij të 10-të, “Donda”, në një studio për të përmbushur afatin e datës së tij të publikimit. I gjithë ky përkushtim normalisht kërkon kthjelltësi dhe padyshim që Kanye e ka gjetur zgjidhjen për këtë. Ai është duke pushuar në një dhomë të vogël, minimaliste deri në përfundim të punës së tij dhe pamjet e saj i ka ndarë më ndjekësit në rrjetin e tij social, Instagram.
Dhoma e 44-vjeçarit gjendet brenda stadiumit Mercedes Benz të Atlantës e cila duhet thënë se është shumë modeste për një miliarder si Kanye. Dhoma e zhveshjes, me mure dhe dysheme gri, nuk ka as një dritare dhe është e pajisur me një gardërobë dhe rafte, një televizor të montuar në mur dhe një shtrat të vetëm me një dyshek të bardhë dhe vetëm me një jastëk të sheshtë.
Rikujtojmë, se Donda është emri i nënës së tij të ndjerë, e cila vdiq në 2007-ën në moshën 58-vjeçare për shkak të ndërlikimeve nga kirurgjia kozmetike. Ky është albumi i 10-të i reperit, që nga viti 2019, “Jesus Is King”.
Artisti u bë tepër emocional teksa këndonte një këngë gjatë festës për albumin e tij “DONDA”. Ka aludime se ajo performancë ishte pikërisht drejtuar ish-bashkëshortes së tij, yllit të “KUWTK”, Kim Kardashian. Ky moment i ndjerë duket se lidhej me Kim pikërisht për vargjet që Kanye këndonte.
