Pavarësisht rifillimit të eksporteve të grurit nga portet e Detit të Zi, sipas një marrëveshjeje të ndërmjetësuar nga OKB-ja dhe Turqia midis Rusisë e Ukrainës më 22 korrik, BE-ja synon të vazhdojë përpjekjet për të krijuar rrugë alternative mallrash për eksportet e grurit ukrainas. Një zyrtar i Komisionit Europian deklaroi:
Megjithë rihapjen e rrugëve detare, një kthim i menjëhershëm në nivelet e paraluftës të eksporteve të Ukrainës mbetet sfidues dhe rrugët alternative të eksportit ende janë vendimtare.
Komisionerja europiane për Transportin, Adina Valean theksoi se “kishte hapësirë për përmirësime”, por vuri në dukje edhe mungesën e vagonëve të mallrave, shoferëve të mauneve e objekteve të magazinimit për prodhimet ukrainase. Sipas Brukselit zyrtar, Ukraina ishte eksportuesja më e madhe në botë e vajit të lulediellit, eksportuesja e tretë më e madhe e elbit, eksportuesja e katërt më e madhe e misrit dhe eksportuesja e pestë më e madhe e grurit, përpara fillimit të pushtimit të Ukrainës nga trupat ruse, më 24 shkurt të këtij viti.
Por, aktualisht, shpresat janë të lidhura me marrëveshjen me Rusinë që mundëson rifillimin e eksporteve të rregullta bujqësore ukrainase nëpërmjet Detit të Zi. Sipas shifrave zyrtare të Unionit, para luftës, deri në pesë milion tonë drithë kalonin çdo muaj nëpër portet e Detit të Zi. Arritja përsëri në të ardhmen e afërt e këtij niveli, konsiderohet e pamundur.
Në një tjetër zhvillim, Volodymyr Zelensky kritikon ashpër arkitekturën e sigurisë në botë si tërësisht të papërshtatshme, duke vënë në dukje jo vetëm luftën në vendin e tij, por edhe konfliktet në Ballkan, Tajvan e Kaukaz. “Të gjitha këto situata duken të ndryshme, megjithatë ato janë të bashkuara nga një faktor, ai që arkitektura globale e sigurisë nuk funksionoi”, – tha presidenti ukrainas në fjalimin e përditshëm.
Zelensky akuzoi edhe një herë Rusinë për shkelje të ligjit ndërkombëtar me pushtimin e paprovokuar të Ukrainës. Vitin 2014 e quajti “pikë kthese”, pas së cilës komuniteti ndërkombëtar thjesht e la Rusinë të bënte veprime të paligjshme si aneksimi i Krimesë ose rrëzimi i fluturimit 17 të “Malaysia Airlines” mbi rajonin e Donbasit në Ukrainën Lindore.