Një grua ka bërë xhiron e rrjetit pasi ka shpërndarë një video duke sjellë në jetë djalin e saj në ujërat e Oqeanit Paqësor. Josy Peukert, 37 vjeçe, postoi video nga dita e lindjes së saj në bregun e Playa Majagual, Nikaragua. Ajo e lindi foshnjën pa ndihmë mjekësore, pasi kishte refuzuar ekot gjatë gjithë shtatzënisë. Foshnja Bodhi Amor Ocean Cornelius lindi më 27 shkurt. Josy tha për “Daily Mail” se:
Unë e mora këtë nismë me kokën time, doja të lindja në oqean dhe për shkak se kushtet ishin të përshtatshme atë ditë, kjo është ajo që bëra. Për javë të tëra monitorova valët dhe kështu, kur ishte koha e duhur për të lindur, e dija se plazhi do të ishte i sigurt për ne.
Kur Josy e dinte se do të fillonte lindjen, fëmijët e saj qëndruan me miqtë, ndërsa partneri e çoi në plazh me një çantë me sende të nevojshme për lindjen. Ajo shtoi:
Dallgët kishin të njëjtin ritëm si kontraktimet, ajo rrjedha e qetë më bëri të ndihesha shumë mirë. Pasi lindi Bodhi dhe u mbështoll me peshqir, u ktheva në oqean për t’u freskuar. Më pas u vesha dhe paketuam gjithçka, u nisëm për në shtëpi ku të tre u futëm në shtrat. Më vonë, atë mbrëmje e peshuam Bodhin me peshore. Ai ishte 3.5 kg.
Josy shpjegoi se pse donte që fëmija i saj të lindte pa ndërhyrje mjekësore.
Lindja ime e parë ishte traumatike në një klinikë, lindja e dytë ndodhi në shtëpi, por në të tretën edhe një mami në shtëpinë time ishte shumë. Këtë herë nuk kisha asnjë takim me mjekun, nuk bëra as skanim. Nuk kishim një datë të caktuar ose afat për ardhjen e foshnjës, ne thjesht besuam se fëmija ynë do të ndiqte rrugëtimin e tij. Nuk kisha frikë apo shqetësime për të mirëpritur një shpirt të ri të vogël në jetën tonë, vetëm unë, partneri dhe valët e oqeanit. Ishte e bukur. Rëra e butë më kujtoi se nuk ka asgjë tjetër mes qiellit dhe tokës, vetëm jetë.
