Dëgjo live TOP ALBANIA RADIO
Dëgjo live TOP GOLD RADIO
Dëgjo live MY MUSIC RADIO
Voto në THE TOP LIST
Aktualitet

Situata në Rinas drejt normalizimit, sot fluturime emergjente, nesër udhëtarët

Gradualisht po i rikthehet normalitetit situata në Aeroportin Ndërkombëtar “Nënë Tereza” të Rinasit. Në një dalje të pak çasteve më parë nga ky aeroport, Ministrja e Infrastrukturës, Belinda Balluku njoftoi se sot rinisin fluturimet esenciale. Këtu përfshihen ato humanitare, shëndetësore, diplomatike e ushtarake.

Gjithashtu, Balluku informoi për sasinë e vaksinave anti-COVID që duhej të mbërrinin dje, nëse kontrollorët e trafikut ajror nuk ndërprisnin punën për të kundërshtuar përgjysmimin e pagave. Veprimet e tyre çuan në anulime të fluturimeve.  

Kemi arritur të ruajmë sasinë e vaksinave të konsiderueshme. Do të vijë sot rreth orës 3 pasdite dhe do të fillojë shpërndarja. Dua të informoj të gjithë qytetarët që do të jetë e pamundur në këto momente të kemi fluturime komerciale por është duke u punuar për zgjidhjen e këtij problemi. Nesër në orët e para të mëngjesit do të kemi situatë normale të fluturimeve.

Më herët, Ministrja Balluku u ngarkua nga Komiteti i Mbrojtjes Civile të marrë masa për rikthimin e fluturimeve në Rinas.

Në një tjetër zhvillim, po në lidhje me atë që ka ndodhur në Rinas, u njoftua se Armando Fezga, kryetar i Sindikatës së Kontrollorëve të Trafikut Ajror, Flora Ndreca dhe Muhir Mezini janë ndaluar me urdhër të Prokurorisë, që i akuzon për “Shpërdorim detyre, të kryer në bashkëpunim”. Pritet që brenda 48 orëve të dalin para Gjykatës së Tiranës për t’u njohur me masën e sigurisë që do të kërkohet nga Prokuroria.