Shumë vende, përfshirë edhe rajonin tonë, po përballen me temperatura ekstreme, ndërsa ekspertët theksojnë nevojën për kujdes të shtuar për t’u mbrojtur nga efektet e vapës së fortë.
Një nga masat më të rëndësishme gjatë valëve të të nxehtit është hidratimi i vazhdueshëm. Me rritjen e djersitjes, organizmi humbet lëngje që duhet të zëvendësohen për të shmangur dehidratimin, por jo gjithmonë është e lehtë të kuptohet kur trupi po vuan mungesë uji.
Sipas James Morehen, nutricionist sportiv dhe ekspert i hidratimit në kompaninë Vidrate, shenjat e dehidratimit shpesh janë të fshehura dhe mund të ngatërrohen me lodhjen e zakonshme.
Ai shpjegon se simptoma si dhimbja e kokës, vështirësia në përqendrim apo ndjenja e lodhjes mund të jenë sinjale të hershme se organizmi po kërkon më shumë lëngje, veçanërisht gjatë temperaturave të larta.
Shenjat e dehidratimit nuk janë gjithmonë të dukshme. Ato mund të shfaqen si dhimbje koke ose vështirësi për t’u përqendruar
-thotë Morehen.
Sipas tij, edhe dëshira e papritur për ushqime të kripura apo të ëmbla mund të lidhet me mungesën e lëngjeve në trup, pasi organizmi shpesh e interpreton lodhjen si uri.
Një tjetër shenjë më pak e njohur është era e keqe e gojës. Kur trupi nuk merr mjaftueshëm ujë, prodhimi i pështymës ulet, duke lejuar grumbullimin e baktereve dhe krijimin e aromave të pakëndshme.
Eksperti thekson gjithashtu se etja është në fakt një shenjë e vonshme e dehidratimit, çka do të thotë se në momentin që ndjeni etje, organizmi tashmë ka nisur të humbasë më shumë lëngje sesa duhet.
Për këtë arsye, ai rekomandon konsum të rregullt të ujit gjatë gjithë ditës, në vend që të pritet shfaqja e etjes.
Pirja e një gote uji në mëngjes dhe një para gjumit ndihmon në ruajtjen e ekuilibrit të lëngjeve në trup
-këshillon Morehen, duke shtuar se uji para gjumit duhet pirë rreth 30–45 minuta më herët për të shmangur ndërprerjet e gjumit.
Sa i përket sasisë ditore, ekspertët rekomandojnë mesatarisht 6 deri në 8 gota ujë, ndërsa gjatë ditëve shumë të nxehta kjo sasi mund të rritet deri në rreth tre litra, sidomos për personat aktivë fizikisht ose ata që qëndrojnë gjatë jashtë.
Një indikator i thjeshtë i hidratimit të mirë është edhe ngjyra e urinës: ajo duhet të jetë e verdhë e çelët, ndërsa ngjyrat më të errëta mund të tregojnë mungesë lëngjesh në organizëm.
