Në çdo episod të “Top Tech” me Mateo Kadriun zbulojmë të rejat më të fundit nga bota e madhe e teknologjisë. Me informacione dhe gjithçka të detajuar rreth risive dhe mundësive që po na ofrohen çdo ditë sidomos nga Inteligjenca Artificiale me avancimin e projekteve nga më të ndryshme.
Nëse deri dje makina jote ishte thjesht për të shkuar nga pika A në B… sot është kthyer në “call center” me rrota.
Sepse WhatsApp tani ka lançuar aplikacionin e vet zyrtar për Apple CarPlay. Po, po — tani mund të lexosh mesazhe, të dërgosh reply, të bësh telefonata dhe të kontrollosh kontaktet… direkt nga ekrani i makinës. Pa “Hey Siri”, pa stres, pa u ndjerë sikur po flet me murin.
Pra je në trafik, nervat në maksimum… dhe ndërkohë po i kthen mesazh shokut: “Jam rrugës”… ndërkohë që nuk ke lëvizur prej 20 minutash. Teknologjia na ndihmon… por “justifikimet” mbeten manuale.
Aplikacioni vjen me tre pjesë: chat-et, historiku i telefonatave dhe kontaktet e preferuara. Domethënë, njerëzit që i telefonon më shpesh janë vetëm një klik larg. Pra në realitet: mami, shefi… dhe ai shoku që të thotë “ku je?” çdo 5 minuta.
Dhe ndërkohë që ti po flet me njerëzit… mund të flasësh edhe me AI. Sepse edhe ChatGPT ka hyrë në CarPlay. Tani mund të bësh biseda me AI ndërkohë që drejton makinën. Po, po — mund t’i thuash: “Ku është rruga më e shkurtër?” dhe në të njëjtën kohë: “Pse më zë gjumi gjithnjë kur kam punë?”
Kjo është epoka ku makina nuk është më thjesht mjet transporti… është psikolog, sekretar dhe shok kafeje, në një.
Sigurisht, ideja është e mirë: më pak telefon në dorë, më shumë fokus në rrugë. Por le të jemi realistë — tani do kemi njerëz që nuk flasin më me pasagjerin… por me AI-n në makinë. “Mos më fol, jam në një diskutim të rëndësishëm me ChatGPT.”
Në fund, një gjë është e sigurt: rruga për në punë nuk do jetë më e mërzitshme… por ndoshta pak më e çuditshme. Sepse tani, edhe makina ka “opinione”.
