Një imazh i papublikuar më parë i regjisorit të njohur amerikan Woody Allen ka dalë në pah pas publikimit të fundit të dosjeve që lidhen me Jeffrey Epstein. Fotoja e paraqet Allen në rezidencën e Epstein në New York, i shoqëruar nga tre gra dhe një burrë tjetër ende i paidentifikuar.
Autoritetet dhe mediat theksojnë se prania e një emri në dosjet Epstein nuk nënkupton automatikisht përfshirje në veprime të paligjshme apo shkelje ligjore.
Vetë Woody Allen ka pranuar më herët se e ka takuar Epstein gjatë një darke në vitin 2010, vetëm disa muaj pasi financieri ishte liruar nga burgu në korrik të vitit 2009. Në një intervistë për Sunday Times në shtatorin e kaluar, regjisori u pyet nëse ndihej i penduar për shoqërimin me Epsteinin.
Në përgjigjen e tij, Allen u shpreh se, si shkrimtar, nuk dekurajohet lehtë dhe se i kishte konsideruar ato darka si intelektualisht interesante, duke shtuar se ngjarjet që dolën më vonë në dritë u bënë një temë reflektimi për të nga këndvështrimi krijues.
Allen gjithashtu ka pohuar se Epstein i kishte thënë se ishte dënuar padrejtësisht, një pretendim që ai e kishte dëgjuar gjatë atyre takimeve.
Fotoja, e cila mban kreditin e Reuters, ka rikthyer vëmendjen publike mbi rrethin shoqëror të Epstein dhe figurat e njohura që kanë pasur kontakte me të përpara se skandali të zbulohej plotësisht.
