Shkaku i vdekjes së aktorit amerikan James Ransone është konfirmuar zyrtarisht disa ditë pas ndarjes së tij nga jeta, duke tronditur fansat dhe botën e kinemasë.
Sipas një certifikate vdekjeje të datës 29 dhjetor, të siguruar nga media PEOPLE më 7 janar, aktori 46-vjeçar ka ndërruar jetë si pasojë e vetëvrasjes.
Ransone u gjet i pajetë më 19 dhjetor në Los Anxhelos, ndërsa Zyra e Ekzaminuesit Mjekësor të Qarkut të Los Anxhelosit e kishte cilësuar fillimisht vdekjen si vetëvrasje të dyshuar.
Tashmë, dokumentet zyrtare kanë konfirmuar përfundimisht shkakun e ndarjes së tij nga jeta.
Vetëm dy ditë pas tragjedisë, bashkëshortja e aktorit, Jamie Ransone, reagoi me një postim prekës në Instagram, ku shprehu dhimbjen dhe dashurinë e pakushtëzuar për të shoqin.
Të kam thënë që të kam dashur një mijë herë dhe e di që do të të dua sërish. Faleminderit për dhuratën më të madhe, ty, Jack-un dhe Violet-in. Ne jemi përgjithmonë
-shkroi ajo, duke përmendur edhe dy fëmijët e çiftit.
Pas vdekjes së aktorit, familjarët dhe miqtë hapën një faqe GoFundMe për të ndihmuar me shpenzimet, ku Ransone u përshkrua si “bashkëshort, baba dhe mik i dashur”, si dhe një prind i përkushtuar që e kishte familjen prioritet absolut.
James Ransone lindi më 2 qershor 1979 në Baltimore dhe u bë i njohur gjerësisht për rolin e Ziggy Sobotka në serialin kult The Wire.
Ai interpretoi gjithashtu versionin e rritur të Eddie Kaspbrak në It: Chapter Two, ndërsa filmografia e tij përfshin tituj si The Black Phone, Tangerine dhe disa seriale të njohura televizive.
Lajmi i ndarjes së tij nga jeta u shoqërua me homazhe të shumta nga kolegë dhe miq të industrisë së filmit, mes tyre Channing Tatum dhe Natasha Lyonne, të cilët e kujtuan Ransone si një artist të talentuar dhe një njeri me zemër të madhe.
