Kolesteroli i lartë është një gjendje e rrezikshme shëndetësore, që ndodh kur në gjak grumbullohen shumë substanca yndyrore. Ai mund të çojë në pasoja serioze, si infarkti apo goditja në tru.
Megjithëse zakonisht nuk ka simptoma të dukshme, ekspertët shëndetësorë paralajmërojnë për dy shenja që mund të shfaqen në fytyrë dhe që nuk duhen injoruar.
Sipas Shërbimit Kombëtar të Shëndetit në Britani (NHS), rreziku për kolesterol të lartë është më i lartë tek burrat, personat mbi moshën 50 vjeç dhe gratë në menopauzë. Në disa raste, gjendja është e trashëgueshme dhe njihet si hiperkolesterolemia familjare.
Organizata Heart UK thekson se, nëse nuk trajtohet, kolesteroli i lartë mund të çojë në sëmundje të zemrës në moshë të re. Por me trajtim të duhur dhe mënyrë jetese të shëndetshme, ai mund të mbahet nën kontroll. Dy shenja në fytyrë që duhet t’i kushtoni vëmendje:
Harku i kornesë
Bëhet fjalë për një unazë të bardhë ose gri që rrethon irisin, pjesën me ngjyrë të syrit. Me kalimin e kohës, kjo unazë mund të bëhet e plotë dhe të sinjalizojë nivele të larta kolesteroli në gjak.
Kardiologu Francisco Lopez-Jimenez nga Klinika Mayo shpjegon se kjo është një shenjë që shpesh anashkalohet.
Xanthelasma
Janë gunga të vogla, me ngjyrë të verdhë, që zakonisht shfaqen pranë syve.
Ato janë rezultat i grumbullimit të kolesterolit nën lëkurë dhe përfaqësojnë një tjetër tregues të mundshëm të kolesterolit të lartë, sipas Klinikës Cleveland.
Çfarë e shkakton kolesterolin e lartë?
Kolesteroli i lartë mund të shkaktohet nga faktorë të ndryshëm, përfshirë dietën e pasur me yndyra të dëmshme, mungesën e aktivitetit fizik, mbipeshën, duhanin dhe konsumimin e alkoolit.
Gjithashtu, disa persona e trashëgojnë këtë gjendje nga familja. Diagnostikimi bëhet përmes analizave të gjakut dhe trajtimi përfshin ndryshime në stilin e jetesës dhe, kur është e nevojshme, përdorimin e medikamenteve.
Nëse vëreni ndonjë nga këto shenja në fytyrë, është e rëndësishme të konsultoheni me një mjek dhe të kontrolloni nivelin e kolesterolit.
Parandalimi dhe ndërhyrja e hershme janë çelësi për të ruajtur një shëndet të mirë kardiovaskular.
