Kur dëgjojmë fjalën “tërheqëse”, shumicës na shkon mendja te pamja fizike. Megjithatë, psikologët thonë se një cilësi tjetër luan rol shumë më të rëndësishëm në mënyrën se si na perceptojnë të tjerët – dhe ajo është dhembshuria.
Sipas ekspertëve të shëndetit mendor, dhembshuria, ose ndjeshmëria ndaj të tjerëve, është një tipar kyç që na bën më të pëlqyeshëm dhe emocionalisht të afërt.
Nuk bëhet fjalë vetëm për të ndjerë keqardhje, por për të ndërtuar një lidhje të thellë dhe të sinqertë me njerëzit, duke treguar mirëkuptim dhe pa gjykim.
Një studim i Universitetit të Karolinës së Veriut në vitin 2019 zbuloi se njerëzit që shfaqin më shumë dhembshuri perceptohen si më të dëshirueshëm në marrëdhënie shoqërore dhe romantike.
Biologjikisht, ne jemi të tërhequr nga ata që na kuptojnë dhe tregojnë kujdes për ne
– shprehet psikologia Eva C. Klohnen.
Jo vetëm kaq, por sjellja e dhembshur ka një efekt pozitiv edhe në shëndetin fizik.
Studimi zbuloi se njerëzit që ushtronin praktika të përditshme për të qenë më të sjellshëm dhe më të qetë, si meditimi me fokus te dashamirësia, kishin tregues më të qëndrueshëm të ADN-së, të cilët lidhen me plakjen e ngadaltë të trupit.
Të qenit i dhembshur nuk ndikon vetëm në marrëdhëniet me të tjerët, por edhe në mirëqenien personale. Sipas të njëjtit studim, njerëzit që ushtronin ndjeshmëri ndaj të tjerëve ishin më optimistë, përjetonin më pak stres dhe kishin një qëndrim më pozitiv ndaj jetës.
Ekspertët rekomandojnë disa hapa të thjeshtë, por efektivë se si të kultivoni dhembshurinë në jetën e përditshme:
1. Mendoni për dikë që doni dhe përpiquni të përjetoni ndjenjat pozitive që lidhen me të.
2. Lejoni që ndjeshmëria dhe qetësia të përshkojnë trupin tuaj, veçanërisht në momente tensioni.
3. Krijoni një ambient të ngrohtë dhe të qetë në shtëpi – përmes luleve, dekorit apo ndriçimit të butë.
4. Shkruani një letër për dikë që e keni përzemër – ndihmon për të shprehur ndjenjat dhe për të liruar mendjen.
5. Përpiquni të vendoseni në vendin e tjetrit para se të gjykoni – kjo është thelbi i empatisë.
Në fund të ditës, bukuria e vërtetë nuk matet me pasqyrën, por me mënyrën se si i bëjmë të tjerët të ndihen. Dhe asgjë nuk është më tërheqëse se një zemër që di të kuptojë, të falë dhe të mbështesë.
