Dhjetori është i njohur për festat dhe momentet e gëzuara familjare që sjell. Në këtë periudhë, shumë familje zbukurojnë shtëpitë e tyre dhe diskutojnë përgatitjen e ushqimeve tradicionale për natën e ndërrimit të viteve. Një nga ëmbëlsirat që nuk mund të mungojë kurrë është bakllavaja, me shijen e saj të pasur dhe mbushjen me arra dhe sherbet.
Bakllavaja është një ëmbëlsirë që ka një histori të gjatë dhe është pjesë e traditës kulinarike të Ballkanit dhe Lindjes së Mesme. Pavarësisht se jemi mësuar ta përgatisim dhe shijojmë atë çdo vit, ka disa fakte interesante që mund të mos i dimë.
Bakllavaja ka qenë inspirim për krijimin e strudelit të mollës, një tjetër ëmbëlsirë të njohur, duke përdorur petë të hollë dhe mbushje me arra.
Një këshillë e njohur në përgatitjen e bakllavasë është trashësia e petëve, të cilat duhet të jenë aq të holla sa të lejojnë që të lexohet një gazetë përmes tyre. Ky zakon ka origjinën te gratë greke, të cilat hapnin petët me kujdes për t’i bërë sa më të holla. Ky proces është në përputhje me kuptimin e fjalës “gjethe” në greqishten e vjetër, që është përdorur për të përshkruar petët e bakllavasë.
Në shumë shtete të Ballkanit Perëndimor dhe Lindjes së Mesme, 17 Nëntori është shpallur si Dita e Bakllavasë, një ditë për t’u festuar me panaire ku konkurohet për gatimin e bakllavasë më të shijshme.
Edhe pse origjina e emrit të bakllavasë është shpesh e lidhur me turqishten, disa studime sugjerojnë se ajo mund të ketë origjinën në Mongoli, nga fjala “të mbështjellësh”, që përshkruan mënyrën tradicionale të përgatitjes.
Në shumë vende, gjithashtu, ka forma të ndryshme të bakllavasë. Në Greqi, për shembull, bakllavaja përgatitet me 33 petë, një referencë për vitet e jetës së Krishtit dhe është një traditë e festës së Krishtlindjeve. Në vendet ballkanike, bakllavaja është zakonisht me arra dhe një sherbet të thjeshtë me sheqer. Ndërsa në Izrael, bakllava përgatitet me një kombinim fistikësh, lajthish, bajamesh dhe erëza si kanella, duke i dhënë asaj një shije unike.
Bakllavaja mbetet një ëmbëlsirë që mbart tradita, histori dhe shije të pasura që kalojnë brez pas brezi, duke u bërë një pjesë e rëndësishme e festave dhe ngjarjeve të veçanta.
