Aromaterapia, një praktikë e lashtë që përdor vajra esencialë për të përmirësuar mirëqenien fizike dhe emocionale, është rikthyer fuqishëm në qendër të vëmendjes, veçanërisht për efektet e saj në performancën mendore dhe përqendrim. Por a funksionon vërtet? Studime të ndryshme kanë analizuar sesi aroma të caktuara ndikojnë në tru dhe aftësitë kognitive.
Një ndër aromat më të studiuara është menda. Një studim i publikuar në “International Journal of Neuroscience” tregon se:
Marrja frymë e vajit esencial të mentës përmirëson vigjilencën dhe kujtesën afatshkurtër te studentët gjatë testeve. Aroma e mentes stimulon aktivitetin në sistemin nervor qendror dhe rrit oksigjenimin e trurit.
Në të njëjtën linjë, aroma e rozmarinës lidhet me përmirësimin e kujtesës afatgjatë. Sipas një studimi të Northumbria University, pjesëmarrësit që u ekspozuan ndaj vajit të rozmarinës rezultuan më të saktë në testet e kujtesës se ata që nuk u ekspozuan fare. Kjo ndodh sepse përbërësi 1,8-cineole, i pranishëm në rozmarinë, ndikon në neurotransmetuesit që lidhen me kujtesën dhe përqendrimin.
Nga ana tjetër, aroma e livandos përdoret më shumë për reduktimin e ankthit dhe stresit, por për çudi, mund të ulë përkohësisht vigjilencën. Një studim japonez tregoi se pjesëmarrësit që ndjenin aromë livandoje para një testi kishin nivele më të ulëta stresi, por edhe një ulje të lehtë të përqendrimit.
Pra, aromaterapia nuk është thjesht një trend lifestyle. Ajo ka baza shkencore dhe ndikimi i saj varet nga qëllimi. Nëse kërkon të përmirësosh përqendrimin dhe performancën mendore, vajrat esencialë si menta dhe rozmarina mund të jenë ndihmues të mirë. Ndërsa për qetësi dhe ulje stresi, livandoja mbetet një zgjedhje e shkëlqyer. Megjithatë, si me çdo metodë alternative, efikasiteti ndryshon nga individi në individ – por është e sigurt që truri ynë reagon ndaj aromave më shumë sesa mendojmë.
