Reperi i njohur amerikan A$AP Rocky është përballë akuzave serioze, pasi është akuzuar për përdorimin e armës dhe qëllimin ndaj një ish-miku të tij në Los Anxhelos. Gjyqi ka nisur këtë të premte dhe, në rast se shpallet fajtor, ai mund të përballet me deri 24 vite burg.
Ngjarja ka ndodhur në nëntor 2021, pranë një hoteli në Hollywood, pas një mosmarrëveshjeje të ashpër mes reperit dhe Terell Ephron, një artist dhe shok i tij i fëmijërisë. Të dy kanë qenë pjesë e grupit hip-hop A$AP Mob dhe e njihnin njëri-tjetrin që në vitet e shkollës së mesme.
Sipas prokurorisë, A$AP Rocky ka nxjerrë armën gjatë diskutimit dhe ka qëlluar dy herë në drejtim të Ephron, i cili ka marrë një plagë të lehtë dhe është trajtuar më pas në një spital në Nju Jork.
Emri i vërtetë i reperit është Rakim Mayers, i cili ka mohuar akuzat dhe është deklaruar i pafajshëm. Avokati i tij ka theksuar se janë të gatshëm për procesin gjyqësor dhe besojnë se do të dalin të pafajshëm.
Çështja ka tërhequr vëmendjen e medias, jo vetëm për shkak të famës ndërkombëtare të A$AP Rocky-t si yll i muzikës hip-hop dhe figurë e modës, por gjithashtu për lidhjen e tij me këngëtaren Rihanna, me të cilën ka një marrëdhënie afatgjatë.
