Grupi legjendar i rock-ut AC/DC ka njoftuar zyrtarisht rikthimin e shumëpritur në atdhe me një turne gjigant në stadiumet e Australisë. Turneu do të nisë më 12 nëntor në “Melbourne Cricket Ground” dhe do të përmbyllet më 14 dhjetor në Brisbane, duke përfshirë ndalesa edhe në qytete të tjera si Sydney, Adelaide dhe Perth.
Ky do të jetë turneu i parë i AC/DC në Australi që nga viti 2015 dhe do të shoqërohet nga grupi Amyl and the Sniffers, që do të ngrohin atmosferën përpara daljes së tyre në skenë.
Pas suksesit të madh të turneve “Black Ice” dhe “Rock or Bust”, AC/DC janë gati të elektrizojnë sërish publikun me hitet e tyre legjendare dhe këngët e reja nga albumi i fundit, “Power Up”.
Pas një turneu të suksesshëm në Europë dhe një performance të fundit në SHBA gjatë majit, grupi është në formën më të mirë për të entuziazmuar fansat në vendlindje.
