Duket sikur koha ka ndalur për Jason Momoa dhe Emilia Clarke. Yjet e serialit legjendar “Game of Thrones” janë ribashkuar papritur të enjten në New York, duke ndezur nostalgjinë e fansave në mbarë botën.
Në foton e publikuar nga vetë Emilia Clarke në Instagram, Momoa, 46 vjeç, shfaqet dukshëm më i gjatë pranë koleges së tij, ndërsa të dy pozonin të buzëqeshur dhe plot afeksion.
Aktorja zbuloi se aktori kishte kaluar për vizitë ndërsa ajo po përgatitej për një paraqitje në emisionin “The Kelly Clarkson Show”.
New York-u më ka dhënë kaq shumë arsye për të qenë mirënjohëse gjatë këtij udhëtimi dhe pikërisht kur mendova se nuk mund të bëhej më mirë… shikoni kush hyri në dhomën time të zhveshjes
-shkroi Clarke, duke emocionuar ndjekësit.
Ky ribashkim vjen plot 15 vjet pasi të dy luajtën së bashku në sezonin e parë të serialit epik të HBO-së, i cili u transmetua për herë të parë në vitin 2011 dhe u shndërrua në një fenomen global.
Emilia Clarke u shfaq elegante me një bluzë të zezë me mëngë të gjata dhe një fund të zi me shkëlqim, të lidhur në bel.
Flokët i kishte të drejta, të ndara në mes, duke nxjerrë në pah buzëqeshjen e saj karakteristike dhe energjinë pozitive.
Nga ana tjetër, Jason Momoa mbeti besnik stilit të tij unik, i veshur me një jelek ulliri mbi një bluzë të zezë të grisur pa mëngë, pantallona kafe, kapelë cilindrike të zezë dhe syze dielli me kornizë të errët.
Ribashkimi i dy ikonave të “Game of Thrones” u prit me entuziazëm të madh në rrjetet sociale, ku fansat nuk vonuan ta quajnë këtë moment “magjik” dhe “një rikthim emocional në Westeros”.
