Timothée Chalamet ka bërë daljen e tij të parë të madhe publike pas Oscars 2026, duke u shfaqur në CinemaCon në Las Vegas, së bashku me Zendaya dhe Jason Momoa, për të prezantuar filmin e shumëpritur “Dune: Part Three”.
Të tre aktorët dolën në skenë krah regjisorit Denis Villeneuve, ku prezantuan pamje ekskluzive nga filmi, përfshirë një sekuencë të madhe beteje që duket se hap historinë e re. Publiku pati mundësinë të shohë edhe momente të reja nga vazhdimi i sagës sci-fi.
Gjatë fjalës së tij, Chalamet u shpreh emocional, duke e cilësuar përfundimin e trilogjisë si një nga përvojat më të rëndësishme të karrierës së tij:
Ka qenë një rrugëtim i veçantë të punoj për tre filma me Villeneuve dhe Zendaya
– tha ai, duke e krahasuar ndikimin e projektit me saga të mëdha si “The Lord of the Rings”.
Filmi i ri bazohet në romanin Dune Messiah të Frank Herbert dhe vijon historinë e Paul Atreides, i cili përballet me pasojat e vendimeve të tij, 17 vite pasi është bërë perandor i universit të njohur.
Sipas Chalamet, personazhi i tij në këtë kapitull shfaqet më i errët dhe më kompleks se më parë, duke premtuar një zhvillim të fortë dramatik.
Në kastin e ri bashkohen edhe emra të njohur si Robert Pattinson dhe Anya Taylor-Joy, ndërsa Jason Momoa rikthehet në këtë projekt.
“Dune: Part Three” pritet të dalë në kinema më 18 dhjetor 2026, duke u konsideruar si një nga filmat më të shumëpritur të vitit.
