Këngëtari i njohur portorikan Bad Bunny ka siguruar rolin e tij të parë kryesor në një film me metrazh të gjatë të titulluar “Porto Rico”, një projekt ambicioz që do të drejtohet nga reperi dhe artisti portorikan Residente.
Filmi përshkruhet si një dramë epike western dhe historike e Karaibeve, e bazuar në ngjarje të vërteta nga historia e Porto Rikos.
Përkrah Bad Bunny në këtë projekt do të interpretojnë edhe aktorët e njohur Edward Norton, Javier Bardem dhe Viggo Mortensen, ndërsa regjisori fitues i çmimeve Oscar Alejandro G. Iñárritu do të jetë producent ekzekutiv.
Sipas raportimeve, historia e filmit bazohet në jetën e revolucionarit portorikan José Maldonado Román, i njohur si “Águila Blanca” (Shqiponja e Bardhë), i cili luftoi kundër kolonializmit në fund të shekullit XIX dhe udhëhoqi kryengritje për identitetin dhe lirinë e popullit portorikan.
Regjisori Residente ka deklaruar se ka ëndërruar prej fëmijërisë të realizojë një film për vendin e tij, me synimin për të treguar historinë e Porto Rikos me ndershmëri dhe intensitet artistik.
Edhe pse Bad Bunny është shfaqur më parë në role dytësore, si në filmin Bullet Train përkrah Brad Pitt dhe në komedinë kriminale “Caught Stealing” me Austin Butler, “Porto Rico” shënon herën e parë që ai do të jetë një nga protagonistët kryesorë në një produksion të madh kinematografik.
Ky zhvillim vjen pas një viti të suksesshëm për artistin, i cili performoi në shfaqjen e pushimit të Super Bowl dhe fitoi disa çmime Grammy Awards, përfshirë atë për Albumin e Vitit.
Duke komentuar projektin, Edward Norton e përshkroi filmin si një vepër që ndërton mbi traditën e dramave të mëdha kinematografike, duke theksuar se bashkëpunimi mes Residente dhe Bad Bunny për të treguar historinë e Porto Rikos pritet të jetë një projekt i fuqishëm artistik dhe historik.
