Një 57-vjeçar ka ndërruar jetë ditën e sotme në një zonë minerare në Bulqizë.
Bashkim Keta, i punësuar si roje në këtë subjekt privat, dyshohet të ketë rënë nga lartësia dhe për pasojë ka ndërruar jetë.
“Bulqizë / Informacion paraprak
Më datë 31.01.2026, në një zonë minerare në Bulqizë, është gjetur pa shenja jete shtetasi B. K., 58 vjeç, i cili punonte rojë private te një subjekt minerar.
Nga hetimet paraprake të kryera dyshohet se 58-vjeçari mund të ketë rrëshqitur nga një lartësi dhe, për pasojë, ka humbur jetën.
Grupi hetimor, nën drejtimin e Prokurorisë, po punon për zbardhjen e rrethanave të kësaj ngjarjeje”, njofton policia.
Zona minerare e Bulqizës, e njohur kryesisht për nxjerrjen e kromit, është shoqëruar prej vitesh me probleme serioze sigurie, aksidente të shpeshta dhe pasoja të rënda për punëtorët dhe mjedisin. Në galeritë nëntokësore janë regjistruar plagosje dhe humbje jete si pasojë e shembjeve, shpërthimeve të gazit, rrëshqitjeve të masave të gurit dhe mungesës së kushteve teknike të përshtatshme.
Shkaqet kryesore lidhen me pajisje të vjetruara, mungesë investimesh në teknologji moderne, trajnime të pamjaftueshme për minatorët, si dhe kontroll e mbikëqyrje joefektive nga institucionet përgjegjëse. Krahas rrezikut për jetën e punëtorëve, aktiviteti minerar ka sjellë edhe ndotje të ajrit, ujit dhe tokës, duke ndikuar negativisht në shëndetin e banorëve të zonës, veçanërisht përmes pluhurit dhe mbetjeve minerare.
Problemet sociale janë gjithashtu të pranishme, pasi minatorët shpesh punojnë në kushte të vështira, me paga jo të kënaqshme dhe me pak mundësi për të kërkuar të drejtat e tyre. Në tërësi, situata në Bulqizë tregon nevojën urgjente për përmirësim të standardeve të sigurisë, rritje të kontrollit shtetëror dhe mbrojtje më të madhe si për punëtorët, ashtu edhe për mjedisin.
