Pas ndarjes nga këngëtarja britanike Lily Allen, aktori i njohur David Harbour po përjeton një fazë reflektimi dhe rigjenerimi personal.
Ylli i serialit të suksesshëm “Stranger Things” ka folur hapur në një intervistë për “Esquire UK” mbi rrugëtimin e tij jetësor, gabimet e së kaluarës dhe mënyrën si ato kanë ndikuar në formimin e tij si njeri dhe artist.
Nëse do të mund të ndryshoja diçka, do të ndryshoja gjithçka ose asgjë
-u shpreh Harbour.
Duhet ta pranosh rrugëtimin tënd plotësisht — edhe dhimbjen, edhe gabimet. Sepse aty gjenden e vërteta, rritja dhe empatia.
Aktori shtoi se përjetimet e vështira janë pjesë e pandashme e krijimtarisë:
Nëse nuk ke kaluar asgjë, çfarë ke për t’u ofruar të tjerëve? Po të kisha një jetë të lehtë e të lumtur, ndoshta nuk do të isha më artist. Pikërisht vuajtjet e bëjnë njeriun më të thellë, më të sinqertë.
Deklaratat e tij vijnë vetëm pak muaj pas përfundimit të martesës katërvjeçare me Lily Allen.
Këngëtarja britanike depozitoi kërkesën për divorc në shtator, duke i dhënë fund marrëdhënies që dikur ishte ndër më të komentuarat në showbiz.
Në albumin e saj të fundit, Allen ka përfshirë këngë që prekin tema si tradhtia, pasiguria dhe mungesa e besimit në çift — këngë që fansat i kanë lidhur drejtpërdrejt me ndarjen nga Harbour.
Në këngët “P–sy Palace” dhe “Tennis”, ajo përshkruan momente të vështira të martesës dhe flet për një periudhë tensioni emocional, ku përfshihet edhe një lidhje e dyshuar e aktorit me stilisten e kostumeve Natalie Tippett, me të cilën ai kishte punuar në filmin “We Have a Ghost”.
Megjithatë, David Harbour duket se ka zgjedhur rrugën e reflektimit në vend të konfliktit.
Ai theksoi se dëshiron të përqendrohet më shumë tek marrëdhëniet personale dhe të tregojë histori më të sinqerta përmes projekteve të ardhshme filmike.
Në këtë fazë të jetës sime dua të rritem, të dua më shumë dhe të jem më i pranishëm për njerëzit që kam pranë
Aktori pritet të rikthehet në ekran me sezonin e fundit të “Stranger Things”, ndërsa ndjekësit e tij e kanë përshëndetur për mënyrën e matur dhe të sinqertë me të cilën po e përballon këtë periudhë tranzicioni.
