Kukësi përfshihet nga moti i keq me erë, reshje shiu e dëbore, si dhe ulje temperaturash. Në lartësitë 600 metër mbi nivelin e detit, reshjet e shiut i kanë lënë vendin borës. Deri më tani, zonat si Arrën, Shishtavec, Kalis, Grykë-Çajë, Zapod, Topojan, Kishaj, Cahan, Valbonë, Dragobi nuk paraqesin probleme në lëvizje pavarësisht se bora ka arritur deri në 5 cm.
Drejtuesit e mjeteve, përdorues të rrugëve nacionale duhet të bëjnë kujdes, veçanërisht në segmentet Kam-Qaf Luzhë, Ura e Topojanit-Shishtavec, Kolosjan-Bushtricë-Kala e Dodës apo Kalimash-Qaf Shllak-Qaf Mali. Këto segmente kanë prezencë të akullit e borës, si dhe rënie të gurëve nga moti i keq.
Shërbimi Meteorologjik Ushtarak bën të ditur se ditën e sotme, vendi ynë ndikohet nga kushte atmosferike të paqëndrueshme për shkak të depërtimit të masave ajrore të lagështa e të ftohta, me origjinë veriore.
Moti vijon me vranësira mesatare deri të dendura, shoqëruar me reshje shiu të herëpashershme, me intensitet të ulët në pjesën më të madhe të territorit e për pjesën më të madhe të ditës. Në periudha afatshkurtra dhe kryesisht në relievet malore në lindje, reshjet e shiut marrin formën e shtrëngatave.
Në zonën e Alpeve e në verilindje, në lartësitë mbi 300-400 metër dhe në juglindje, në lartësitë mbi 700 metër ka reshje dëbore me intensitet të ulët e lokalisht deri mesatar. Po ashtu, mjegull e dendur lokale/mjegullinë gjatë orëve të mëngjesit e mbrëmjes në momentin e reshjeve të shiut dhe të dëborës.
Era fryn me drejtim verilindje-veriperëndim e me shpejtësi mesatare 10 m/s, ndërsa përgjatë vijës bregdetare e në lugina, hera-herës fiton shpejtësi 12-18 m/s, shoqëruar me valëzim në dete të forcës 2-4 ballë.
Temperaturat parashikohen:
Shkodër
8/18
Re shi
Kukës
8/12
Re shi/borë
Lezhë
10/19
Re shi
Dibër
7/10
Re shi/borë
Durrës
10/19
Re shi
Tiranë
10/19
Re shi
Elbasan
9/18
Re shi
Berat
7/18
Re shi
Vlorë
9/17
Re shi
Korçë
5/9
Re shi/borë
Gjirokastër
8/19
Re shi
Sarandë
10/20
Re shi
