Nick Reiner ka dalë sot për herë të parë para gjykatës në Los Angeles, i akuzuar për vrasjen e dyfishtë të prindërve të tij. 32-vjeçari u paraqit në sallën e gjyqit i veshur me xhinse dhe me një jelek kundër vetëvrasjes, pa bluzë poshtë tij.
Gjatë seancës, Reiner nuk deklaroi fajësi dhe gjykata vendosi që seanca e radhës, ku pritet të bëhet leximi zyrtar i akuzave, të shtyhet për më 7 janar.
Kur gjyqtari e pyeti nëse pranonte të hiqte dorë nga e drejta për një paraqitje të shpejtë në gjykatë, ai u përgjigj shkurt:
Po, i nderuar
Avokati i tij, Alan Jackson, u bëri thirrje mediave dhe publikut që të tregojnë përmbajtje, duke deklaruar se çështja përfshin “probleme shumë komplekse dhe serioze” dhe se sistemi i drejtësisë duhet të lejohet të funksionojë pa një “gjykim të nxituar”.
Rob Reiner, 78 vjeç, figurë legjendare e Hollivudit, dhe bashkëshortja e tij, fotografja Michele Singer Reiner, 70 vjeç, u gjetën të pajetë të dielën në rezidencën e tyre luksoze në Los Angeles, me vlerë 13.5 milionë dollarë. Sipas autoriteteve, të dy kishin plagë të shumta nga goditje me thikë.
Prokuroria ka ngritur ndaj Nick Reiner dy akuza për vrasje të shkallës së parë, duke shtuar edhe rrethana rënduese, përfshirë vrasjen e shumëfishtë dhe përdorimin e një arme të ftohtë.
Nëse shpallet fajtor, ai mund të përballet me burgim të përjetshëm pa mundësi lirimi me kusht, ose edhe me dënimin me vdekje.
Me urdhër të gjyqtarit, gjatë seancës nuk u lejuan fotografi apo video. Megjithatë, një skicë nga salla e gjyqit e tregon Reiner me fytyrë të ngrirë dhe pa shprehi emocionale. Ai foli vetëm tre fjalë gjatë gjithë seancës, ndërsa avokati i tij kërkoi më shumë kohë për përgatitjen e mbrojtjes dhe ngriti gjithashtu shqetësime lidhur me identifikimin në këtë fazë të procesit.
Çështja pritet të ndiqet nga afër, ndërsa autoritetet premtojnë përditësime të mëtejshme në ditët në vijim.
