Jake dhe Romy Reiner, fëmijët e regjisorit legjendar Rob Reiner dhe bashkëshortes së tij Michele Singer Reiner, kanë reaguar publikisht pas vrasjes së tmerrshme që tronditi Hollywood-in.
Në një deklaratë për PEOPLE, ata shprehen se po përjetojnë një dhimbje të pamatshme.
Fjalët nuk mund të përshkruajnë dhimbjen e paimagjinueshme që po ndjejmë çdo moment të ditës. Humbja shkatërruese e prindërve tanë është diçka që askush nuk duhet ta përjetojë. Ata nuk ishin vetëm prindërit tanë, por edhe miqtë tanë më të mirë
-thuhet në deklaratë.
Jake dhe Romy falënderuan publikisht të gjithë ata që u kanë qëndruar pranë në këto momente të errëta, duke kërkuar privatësi dhe respekt.
Lutemi që spekulimet të trajtohen me mëshirë dhe humanizëm dhe që prindërit tanë të kujtohen për jetët e jashtëzakonshme që kanë jetuar dhe dashurinë që kanë dhënë
-shtuan ata.
Ndërkohë, prokuroria e Los Angeles ka ngritur dy akuza për vrasje në shkallë të parë ndaj Nick Reiner, vëllait të tyre, i cili dyshohet se ka qëlluar për vdekje prindërit e tij në rezidencën familjare më 14 dhjetor.
Sipas autoriteteve, trupat e Rob dhe Michele Reiner u gjetën në dhomën e tyre të gjumit. Raportimet tregojnë se Romy ka zbuluar trupin e të atit dhe është larguar nga shtëpia pa e ditur se edhe nëna e saj ishte viktimë e sulmit.
Burime pranë hetimit kanë zbuluar për PEOPLE se disa orë para krimit, Rob dhe Nick kishin pasur një konflikt të ashpër verbal gjatë një feste të organizuar nga Conan O’Brien.
Rob Reiner, ikonë e kinemasë amerikane, është i njohur për filma të paharrueshëm si When Harry Met Sally, The Princess Bride dhe A Few Good Men, si edhe për rolin e tij në serialin legjendar All in the Family.
Ai dhe Michele ishin të martuar që nga viti 1989 dhe kishin një familje të madhe, përfshirë edhe Tracy, vajzën e Rob nga martesa e parë.
Ngjarja ka tronditur opinionin publik dhe ka hapur një debat të gjerë mbi dhunën familjare dhe pasojat tragjike të konflikteve të pazgjidhura.
