Presidenti i SHBA-së, Donald Trump, tha se ka të ngjarë të zgjasë një afat për kompaninë kineze ByteDance për të shitur asetet amerikane të aplikacionit të videove të shkurtra TikTok. Presidenti tha në maj se do të zgjasë afatin e 19 qershorit pasi aplikacioni e ndihmoi me votuesit e rinj në zgjedhjet e vitit 2024. Komentet e tij për gazetarët në Air Force One të martën e përsëritën këtë qëndrim. “Ndoshta, po”, citohet të ketë thënë Trump kur u pyet për zgjatjen e afatit. “Ndoshta duhet të marrim miratimin e Kinës, por mendoj se do ta marrim. Mendoj se Presidenti Xi (Jinping) në fund të fundit do ta miratojë atë”.
Maps Interlude publikoi një hartë të Evropës që tregon se cili aplikacion është instaluar më shumë herë në vendet evropiane gjatë vitit 2024. Tre aplikacione dominuan dhe më i popullarizuari midis tyre është Temu. Përveç Temu, i cili, ndër të tjera, ishte më i popullarizuari në Gjermani, Francë, Spanjë, Britaninë e Madhe dhe vende të tjera evropiane, harta dominohet nga ChatGPT, i cili është veçanërisht i popullarizuar në Evropën Qendrore dhe Juglindore.
Ndërkaq një studim nga the Guardian zbuloi se më shumë se gjysma e të gjitha videove më të njohura në TikTok që ofronin këshilla për shëndetin mendor përmbanin dezinformata. Njerëzit po i drejtohen gjithnjë e më shumë rrjeteve sociale për mbështetje të shëndetit mendor, por hulumtimi ka zbuluar se shumë prej tyre po përhapin dezinformata. Ata që kërkojnë ndihmë përballen me këshilla të dyshimta, të tilla si ngrënia e portokalleve në dush për të reduktuar ankthin.
Ekspertët thonë se informacione të tilla në TikTok janë plot me këshilla të padobishme, të dëmshme dhe ndonjëherë të rrezikshme për shëndetin mendor dhe janë shkatërruese dhe shqetësuese. Ata i bënë thirrje qeverisë të forcojë rregulloren për të mbrojtur publikun nga përhapja e dezinformatave. The Guardian ndau 100 videot më të shikuara të postuara nën hashtagun #mentalhealthtips në TikTok me psikologë, psikiatër dhe ekspertë akademikë, të cilët vlerësuan nëse postimet përmbanin dezinformata.
