Presidentja e Komisioni Evropian, Ursula von der Leyen, deklaroi sot se ekziston një rrezik real për përshkallëzim të mëtejshëm, teksa Irani dhe Izraeli po nisin sulme të reja pas vrasjes së udhëheqësit suprem të Iranit, Ali Khamenei.
“Rreziku i përshkallëzimit të mëtejshëm është real. Kjo është arsyeja pse një tranzicion i besueshëm në Iran është urgjentisht i nevojshëm, një tranzicion që rivendos stabilitetin dhe hap rrugën për një zgjidhje të qëndrueshme”, shkroi von der Leyen në platformën X.
Shefja e BE-së bëri të ditur se kishte zhvilluar biseda telefonike me Emirin e Katarit, Tamim bin Hamad Al Thani, si dhe me Princin e Kurorës së Arabisë Saudite, Mohammed bin Salman.
“Diskutuam pasojat e sulmeve të pamatura dhe pa dallim të Iranit ndaj Izraelit”, tha ajo, duke iu referuar telefonatës me Emirin e Katarit. “Me rajonin në trazira të thella, Katari mund të mbështetet në solidaritetin e fortë evropian”, tha Ursula von der Leyen.
Izraeli njoftoi sot se kishte nisur një “valë të gjerë sulmesh” në “zemrën e Teheranit”, ndërsa Irani është hakmarrë duke vazhduar të sulmojë bazat ushtarake izraelite dhe amerikane në të gjithë Lindjen e Mesme. Trump thotë se do të përdorë “fuqi që nuk është parë kurrë më parë” si kundërpërgjigje.
Më vonë, shpërthime të reja u raportuan në Teheran pranë kompleksit ku ndodhet radioja dhe televizioni shtetëror iranian.
Zyrtarët thonë se Irani ka lëshuar më shumë se 25 valë raketash dhe dronësh, dhe shpërthime janë dëgjuar tani në Izrael, Oman, Bahrein, Katar, Kuvajt dhe Emiratet e Bashkuara Arabe.
Pa një udhëheqës, Ayatollah Alireza Arafi është emëruar si anëtari i tretë dhe i fundit i Këshillit udhëheqës të Iranit, i cili ushtron rolin e udhëheqësit suprem deri sa të zgjidhet një pasues.
Deri më tani është konfirmuar vdekja e ish-presidentit Mahmoud Ahmadinejad, shefit të stafit të forcave të armatosura të vendit, Abdolrahim Mousavi, komandantit të Gardës Revolucionare, Gjeneralit Mohammad Pakpour, vajzës, dhëndrit dhe nipit të Khameneit dhe rreth 40 zyrtarëve të tjerë.
Të paktën 150 anije me naftë e gaz kanë ngecur në Ngushticën e Hormuzit, një rrugë jetike globale për naftën, e cila kontrollohet nga Irani.
