Aktori i njohur Dwayne “The Rock” Johnson u përfshi nga emocionet gjatë premierës së filmit të tij më të ri, “The Smashing Machine”, në Festivalin e Filmit në Venecia, ku publiku e priti me duartrokitje të pandërprera që zgjatën plot 15 minuta.
Në pamjet e shpërndara nga festivali, Johnson shihet duke fshirë lotët krahas koleges së tij në film, Emily Blunt, ndërsa salla shpërthen në ovacione të fuqishme. Gazetari i “Variety”, Ramin Setoodeh, e përshkroi skenën si një nga momentet më prekëse të këtij edicioni:
Dwayne Johnson po qante gjatë 15 minutave të ovacioneve në Venecia për “The Smashing Machine”. Ky ishte momenti më emocional që kemi parë në Lido që nga koha kur Brendan Fraser nisi këtu fushatën e tij për Oscar me filmin “The Whale” katër vite më parë.
Ky reagim ka ngjallur menjëherë spekulime se The Rock mund të jetë një pretendent serioz për një nominim për Oscar. Krahasimet me Brendan Fraser në vitin 2022, kur ai u rikthye fuqishëm në Venecia dhe më pas fitoi Oscar-in për aktorin më të mirë, janë tashmë të pashmangshme.
Filmi “The Smashing Machine”, me regji dhe skenar të Benny Safdie, është një dramë sportive ku Johnson portretizon legjendën e MMA-së, Mark Kerr, jeta e të cilit u bë më parë subjekt i një dokumentari të suksesshëm të HBO.
Krahas tij, Emily Blunt interpreton rolin e Dawn, të dashurës së përkushtuar të Kerr, duke shënuar bashkëpunimin e tyre të dytë pas filmit “Jungle Cruise”.
Premiera amerikane e “The Smashing Machine” është caktuar për 3 tetor, dhe pritshmëritë janë të larta që ky rol të jetë një nga interpretimet më të rëndësishme të karrierës së Johnson.
