Gruaja e Jeff Bezos, Lauren Sanchez Bezos, është kthyer në një nga emrat më të komentuar të Met Gala 2026, por jo për arsyet që mund të priste.
Edhe pse është një nga organizatoret e eventit më prestigjioz të modës, paraqitja e saj ka ndezur një valë kritikash në rrjetet sociale.
Shumë përdorues kanë shprehur zhgënjim për zgjedhjen e saj, duke e cilësuar si të dobët dhe pa frymëzim, pavarësisht luksit dhe mundësive që ajo ka në dispozicion.
Sanchez u shfaq në shkallët e Metropolitan Museum of Art me një fustan të personalizuar nga Schiaparelli, me korse dhe detaje me lidhëse në pjesën e pasme. Pamja e saj ishte frymëzuar nga vepra ikonike Madame X e piktorit John Singer Sargent, një portret që në kohën e vet shkaktoi skandal për guximin estetik.
Megjithatë, ky referim artistik nuk i bindi kritikët online. Komentet shpërthyen menjëherë, me disa që ironizonin: “Mund të blesh Met Gala-n, por jo stilin”, ndërsa të tjerë shtonin: “Gjithë ato para dhe kjo është më e mira që mund të bësh”.
Pavarësisht konceptit pas veshjes, reagimet tregojnë se publiku nuk është impresionuar, duke e kthyer paraqitjen e saj në një nga më të debatueshmet e mbrëmjes.
