Ekspertët e zhvillimit të fëmijëve prej kohësh e dinë se lidhja mes kujdestarëve dhe fëmijëve është thelbësore për rritjen e shëndetshme. Tani, një numër në rritje studimesh po sugjerojnë se e qeshura mund të shërbejë si një tregues i rëndësishëm i zhvillimit të trurit dhe i aftësive sociale te fëmijët. Sipas studiuesve, e qeshura shfaqet shumë përpara se foshnjat të shqiptojnë fjalët e para dhe mund të ketë një rëndësi klinike më të madhe sesa mendohej më parë. Në një epokë të dominuar nga ekranet dhe shpërqendrimet digjitale, si dhe në një kohë kur shumë prindër përballen me nivele të larta stresi, specialistët paralajmërojnë se e qeshura nuk duhet parë thjesht si argëtim.
“E qeshura është ndoshta një nga aftësitë tona më të rëndësishme sociale”, tha Sophie Scott, neuroshkencëtare dhe profesoreshë ne UCL. Truri i njeriut ka dy sisteme që kontrollojnë vokalizimin. Njëri është i lashtë nga pikëpamja evolucionare dhe lidhet me reagimet emocionale spontane, ndërsa tjetri është përgjegjës për komunikimin e vetëdijshëm.
Tek foshnjat, sistemi i parë funksionon që në muajt e parë të jetës. Sipas psikologes së zhvillimit Gina Mireault, foshnjat zakonisht fillojnë të qeshin në mënyrë të pavullnetshme rreth moshës 3 deri në 4 muajsh. Kjo lidhet me strukturat limbike të trurit, të cilat kontrollojnë emocionet, kujtesën dhe sjelljen.
Rreth muajit të gjashtë, foshnjat fillojnë të qeshin në mënyrë të qëllimshme, një zhvillim që lidhet me maturimin e qendrave motorike dhe të të folurit në tru. Studimet tregojnë se njerëzit kanë rreth 30 herë më shumë gjasa të qeshin kur janë me të tjerë sesa kur janë vetëm. Edhe fëmijët shumë të vegjël e kuptojnë funksionin social të të qeshurës, duke bërë gjëra për të shkaktuar të qeshura te prindërit ose duke përdorur reagimet e tyre për të kuptuar nëse një situatë është e sigurt apo kërcënuese.
