Një studim i ri i realizuar nga King’s College London dhe Universiteti i Oksfordit ka zbuluar ndryshime të mëdha mes antidepresantëve në ndikimin e tyre fizik, si pesha trupore, rrahjet e zemrës dhe tensioni i gjakut. Kërkimi, që përfshiu mbi 58,500 pacientë dhe krahasoi 30 lloje medikamentesh, tregon se efektet mund të shfaqen që në tetë javët e para të përdorimit. Diferencat janë të dukshme: disa barna mund të shkaktojnë ndryshime deri në 4 kg në peshë, 21 rrahje më shumë ose më pak në minutë në ritmin e zemrës dhe ndryshime të ndjeshme në presionin e gjakut.
Sipas studiuesve, këto efekte mund të kenë pasoja afatgjata për shëndetin kardiovaskular, ndaj mjekët duhet të zgjedhin terapinë sipas karakteristikave individuale të pacientit. “Qëllimi nuk është të frikësojmë pacientët, por t’i ndihmojmë ata dhe mjekët të marrin vendime më të informuara,” tha Dr. Toby Pillinger. Ekipi shkencor po zhvillon një mjet online falas për të ndihmuar mjekët dhe pacientët të zgjedhin trajtimin më të përshtatshëm, duke hapur rrugën për një qasje më të personalizuar dhe më të sigurt në kujdesin ndaj shëndetit mendor.
Depresioni, lodhja mendore dhe irritimi shpesh lidhen me nivele të ulëta të serotoninës. Pa aminoacidin e quajtur triptofan, truri nuk mund të prodhojë serotonin, substancën që ndikon jo vetëm në humor, por në mënyrën si e përjetojmë realitetin. Kur mungon serotonina, shfaqen irritimi, impulsiviteti, agresiviteti dhe ndjenja e zbrazëtisë. Serotonina njihet shpesh si “hormoni i lumturisë”, por funksioni i saj është shumë më kompleks. Ajo ndikon pothuajse në çdo qelizë të trurit dhe rregullon emocionet, gjumin, oreksin, dhimbjen dhe aftësinë për të përballuar stresin.
Kur niveli i saj bie, bota duket më e errët, mendimet bëhen më të ngushta dhe emocionet më të vështira për t’u kontrolluar. Gjithçka fillon nga triptofani, aminoacidi që trupi nuk e prodhon vetë dhe duhet ta marrë përmes ushqimit. Kur mungon për një periudhë të gjatë, truri nuk arrin të sintetizojë serotonin, gjë që çon në irritim, tërheqje sociale dhe prirje depresive. Ulja e serotoninës pengon fleksibilitetin mendor, pra aftësinë e trurit për t’u përshtatur me ndryshimet pozitive në mjedis. Si pasojë, njeriu ngec në cikle mendimesh negative, edhe kur jeta objektivisht përmirësohet.
