Beyonce ka nisur zyrtarisht turneun e saj të shumëpritur “Cowboy Carter” me një koncert spektakolar në stadiumin SoFi pranë Los Angeles, duke promovuar albumin me të njëjtin emër që i solli edhe një çmim të fundit Grammy.
Performanca e parë u hap me këngën “American Requiem”, ku këngëtarja u shfaq në një kostum të bardhë kauboji, e rrethuar nga balerinë të veshur me të kuqe, në një skenografi vizualisht mbresëlënëse.
Megjithatë, pavarësisht suksesit artistik dhe vlerësimeve pozitive për albumin, turneu është përballur me disa pengesa të papritura.
Sipas mediave të huaja, stadiumi nuk ishte i mbushur plotësisht – mbi 3,000 vende mbetën bosh vetëm pak minuta para fillimit të shfaqjes.
Organizatorët pretendojnë se janë shitur rreth 94% e biletave, por problemet duket se lidhen me fenomenin e rishitjes masive. Shumë rishitës i blenë biletat në sasi të mëdha për t’i shitur më vonë me çmime më të larta, por përballë kërkesës së ulët, shumë prej tyre mbetën pa u shitur.
Për pasojë, disa bileta përfunduan në treg online për vetëm 20 deri në 30 dollarë, ndryshe nga çmimet fillestare që kapnin shifra qindra apo mijëra dollarëshe.
Përveç çmimeve të kripura, një tjetër faktor që përflitet se ka ndikuar negativisht në pjesëmarrje është polemika që përfshin jetën personale të Beyonce dhe Jay-Z.
Miqësia e mëparshme e çiftit me reperin Sean “Diddy” Combs – aktualisht nën akuza të rënda dhe në paraburgim – ka tërhequr vëmendje negative, edhe pse Jay-Z nuk përballet më me padi.
Turneu “Cowboy Carter” do të vijojë në qytete të tjera në SHBA përpara se të zhvendoset në Evropë, ku pritet të përfundojë në fund të korrikut.
Edhe pse “Renaissance World Tour” i vitit të kaluar theu rekorde me mbi 580 milionë dollarë të ardhura, kjo nisje e vështirë tregon se edhe yjet më të mëdhenj mund të përballen me sfida të mëdha.
