Në një konferencë për shtyp në Shtëpinë e Bardhë për të diskutuar planet e reja të prodhimit të Apple në SHBA, CEO Tim Cook i paraqiti një dhuratë Presidentit Donald Trump; një copë qelqi “unike” nga prodhuesi i xhamave për iPhone, Corning, e vendosur në një bazë ari 24 karatësh. Copa e qelqit është një “disk i madh” me logon e Apple të gdhendur në të.
Në pjesën e sipërme të xhamit, është shtypur emri i Presidentit Trump. Në pjesën e poshtme, ka një nënshkrim që duket të jetë i Cook, si dhe mesazhi “Made in USA” dhe viti 2025. Ndërkaq, Trump ka kërcënuar Apple dhe prodhues të tjerë të telefonave me tarifa nëse nuk sjellin prodhim në SHBA. Rikujtojmë se Apple po shqyrton mundësinë që të sjellë ekranet tandem OLED në iPhone që nga viti 2028, sipas një raporti të ri nga The Elec.
Teknologjia tandem OLED, e përdorur për herë të parë në iPad Pro 2024, përfshin dy shtresa OLED të mbivendosura, duke ofruar ndriçim më të lartë dhe konsum më të ulët të energjisë. Apple thuhet se preferon një version të thjeshtuar të kësaj teknologjie. LG Display dhe Samsung Display janë të përfshira në bisedime me kompaninë. Duke ndjekur ciklin e zakonshëm dyvjeçar të zhvillimit dhe prodhimit, iPhone-i i parë me këtë ekran pritet të debutojë në vitin 2028. Teknologjia do të përdoret fillimisht te modelet Pro.
