Trupi i një fëmije të vogël u gjet i varrosur në oborrin e një shtëpie nga policia australiane që po hetonte një zhdukje. Zbulimi i djalit 18-muajsh u bë në një banesë në Brookfield, në veriperëndimin e jashtëm të Melburnit. Policisë iu deshën rreth gjashtë orë për të gjetur atë që kërkonin, pasi filluan gërmimet të hënën.
Fëmija ishte varrosur në një varr vetëm 50 cm të thellë dhe është e mundur që eshtrat e tij të kenë qenë aty për më shumë se një dekadë. Sipas 7News, i vogli kishte jetuar në atë shtëpi me prindërit dhe dy vëllezërit e motrat e tij në vitin 2014, para se të shkonin jashtë vendit, ndoshta në Shqipëri. Nuk ishte raportuar i zhdukur në atë kohë.
Pronari aktual i shtëpisë u takua me policinë, që i shpjegoi se dyshohej që një trup ishte varrosur vetëm disa metra larg derës së pasme.
Diçka e tillë nuk duhet të ndodhte, por ka ndodhur vite më parë. Diçka shumë e keqe. Shumë e tmerrshme, tha ai për 7News.
Policia e Viktorias theksoi se banorët aktualë nuk kanë asnjë njohuri apo lidhje me hetimin ose me personat që kanë jetuar më parë në atë pronë. Ende nuk ka identifikim zyrtar.
Një autopsi do të kryhet në kohën e duhur. Njësia për Personat e Zhdukur do të marrë drejtimin e hetimit, i cili mbetet në vazhdim.
Duket se policia është sinjalizuar nga një i afërm i fëmijës, i cili nuk ka mundur ta mbajë më sekretin. Nuk është ende e qartë nëse autoritetet australiane janë vënë në kontakt me autoritetet shqiptare. Australia ka një marrëveshje ekstradimi me Shqipërinë.
