Shumë gra e kanë vënë re se parfumi i tyre i preferuar nuk ka gjithmonë të njëjtën aromë. Shkenca tregon se kjo nuk është rastësi, por lidhet drejtpërdrejt me ndryshimet hormonale gjatë ciklit menstrual, të cilat ndikojnë në kimikën e lëkurës dhe perceptimin e aromave.
Sipas studimeve të publikuara në revistën “Chemical Senses” dhe të mbështetura nga Instituti Kombëtar i Shëndetit në SHBA, nivelet e hormoneve si estrogjeni dhe progesteroni ndikojnë në ndjeshmërinë e nuhatjes dhe mënyrën se si vajrat natyralë të lëkurës bashkëveprojnë me parfumet.
Gjatë ovulacionit, kur estrogjeni është në nivelin më të lartë, gratë bëhen më të ndjeshme ndaj aromave. Kjo bën që notat e parfumeve me bazë lulesh ose frutash të duken më të ëmbla, më të gjalla dhe më të këndshme.
Ndërsa në ditët para menstruacioneve, progesteroni merr rol dominues. Ky hormon priret të zbusë ose zbehë aromat, duke i bërë ato të duken më të rënda ose më pak tërheqëse. Në disa raste, parfumi duket sikur humbet shpejt nga lëkura.
Ekspertët shpjegojnë se sekreti fshihet tek pH i lëkurës dhe prodhimi i vajrave natyralë, të cilët ndryshojnë gjatë muajit. Nëse lëkura bëhet më acidike, aroma mund të kthehet më e mprehtë ose edhe pak e hidhur.
Prandaj, specialistët e parfumeve këshillojnë që para se të zgjidhet një aromë karakteristike (“signature scent”), të testohet disa herë gjatë fazave të ndryshme të ciklit menstrual.
Një parfum që duket ideal në javën e dytë mund të perceptohet krejt ndryshe në javën e katërt.
Ky fenomen, përveçse interesant, tregon edhe lidhjen e ngushtë mes trupit dhe përjetimeve tona shqisore. Për shumë gra, parfumi nuk është thjesht një aromë, por një reflektim i gjendjes së brendshme hormonale dhe emocionale.
