Shqipëria është mposhtur në ndeshjen e parë të Eliminatoreve të Botërorit 2026, duke humbur 2-0 në Wembley përballë Anglisë. Në studio me Glenti Nallbanin, Lorenc Jeminin, Edi Manushin, Gëzim Sinematin dhe Ervin Fakaj në “Pasó| Angli – Shqipëri” pas përfundimit të ndeshjes, bënë edhe një analizë rreth lojës që bëri Kombëtarja jonë dhe realizuan edhe lidhje direkte nga Wembely me Berat Gjimshitin, Armando Brojën, Jasir Asanin dhe trajnerin Sylvinho.
Sulmuesi i Kombëtares dha menjëherë impakt në fushë, teksa në prononcimin e tij pas ndeshjes tha se Kombëtarja kishte mundësi të dilte me pikë nga ky takim nëse do të shfrytëzonte shanset që kishte.
“E dinim që do të ishte e vështirë. Anglia ka një nivel shumë të lartë. E dimë që ka shumë kualitet. E dinim që ishim te shtëpia e tyre. Gjithçka është e mundur dhe kishim në dorë disa shanse për të shënuar. Nuk ishim në 100%. Siç thashë, Anglia ka shumë kualitet. Edhe kur lodhet ndonjë lojtar, ka të tjerë që e zëvendësojnë. Ekipi ka luajtur mirë. Kishim mundësi për të mos i pësuar ato dy gola. Një ishte pasim prapa shpinës dhe tjetri ishte vetëm krosim në shtyllën e dytë.
Nuk e di. Jam kthyer nga një dëmtim i gjatë. Ka qenë pak i vështirë për mua ky vit. Jam i fokusuar te vetja, te trupi… Mos të dëmtohem sërish. Sot edhe unë kisha shanse. Edhe një ditë tjetër mund t’i shfrytëzoj ato shanse që do kem. I kishim dy mundësi në fund.
Kombëtarja më ka munguar shumë. Edhe përpara Europianit e thashë që më pëlqen shumë të luaj me Kombëtaren. Është shtëpia ime. Tifozët ishin të mrekullueshëm. Na kanë mbështetur shumë. Jam shumë i kënaqur që u ktheva me ekipin dhe tani mund të rikuperohem 100% dhe të vazhdojë pa dëmtime”, tha Broja për DigitAlb.
