Lionel Messi është përfshirë në një situatë ligjore të ndërlikuar për vilën e tij luksoze në Ibiza, të cilën e bleu në vitin 2022.
Sipas raportimeve nga gazeta spanjolle “Periódico de Ibiza y Formentera”, një pjesë e pronës së tij në zonën Cala Tarida mund të përballet me urdhër për prishje, pasi dyshohet se është ndërtuar pa lejet e nevojshme ndërtimore.
Rezidenca madhështore, që shtrihet në një sipërfaqe prej 568 metrash katrorë dhe përfshin një bodrum, pishinë, zonë spa, sallë kinemaje dhe ndërtesa ndihmëse, ndodhet në tokë bujqësore komunale ku ndërtimet e reja janë të ndaluara.
Sipas hetimeve, pronari i mëparshëm – një biznesmen zviceran – kishte kërkuar leje për disa ndryshime strukturore, por bashkia e Sant Josep nuk e miratoi kurrë kërkesën dhe nuk lëshoi asnjë certifikatë për banim.
Autoritetet lokale kanë deklaruar se certifikata e përshtatshmërisë për banim mund të jepet vetëm nëse pjesët e ndërtuara pa leje prishen.
Përmes kompanisë “Edificio Rostower” dhe shoqërisë mëmë “Limecu”, e përfaqësuar nga vëllai i tij Rodrigo Messi, ylli argjentinas ka nisur procedurat ligjore për të rregulluar dokumentacionin dhe për të legalizuar vilën.
Kjo nuk është hera e parë që prona e Messit bëhet objekt polemikash.
Vitin e kaluar, aktivistët e lëvizjes mjedisore “Futuro Vegetal” spërkatën fasadën e vilës me bojë të kuqe dhe të zezë, duke e quajtur ndërtimin “të paligjshëm” dhe duke kritikuar ndikimin mjedisor të pasurisë së tepërt.
Vila në Ibiza mbetet një ndër vendet e preferuara të pushimit për Messin, ku shpesh është parë me familjen dhe miqtë e tij të afërt, përfshirë Luis Suarez dhe Cesc Fabregas.
